darakchi.uz сайти фотосурати
«Саховат» ва «Мурувват» интернат уйлари, шунингдек, уруш ва меҳнат фахрийлари учун Республика пансионати Ўзбекистон Давлат божхона қўмитаси (ДБҚ)га бириктирилади. Бу ҳақда мамлакат президенти Шавкат Мирзиёев 30 август куни қарор имзолади.
«Саховат» интернат уйлари ёлғиз кексалар ва 18 ёшдан ошган I ва II гуруҳ ногиронларининг яшаши учун мўлжалланган. «Мурувват»да 18 ёшдан ошган I ва II гуруҳ оғир руҳий касалликка чалинган ногиронлар яшайди. Мазкур тиббий-ижтимоий муассасалар 2018 йили Соғлиқни сақлаш вазирлиги ҳузурида ташкил этилган Тиббий-ижтимоий хизмат кўрсатиш агентлиги тасарруфида бўлиб, 2021 йил март ойидан мустақил органга айланди.
Давлат божхона қўмитасига Агентликка қуйидаги масалаларда ёрдам бериш топширилади:
👉 тиббий-ижтимоий муассасаларнинг моддий-техник базасини мустаҳкамлаш ва уларнинг инфратузилмасини яхшилаш;
👉 тиббий-ижтимоий муассасаларда васийликка олинган кексалар ва ногиронлиги бўлган шахслар учун қулай шарт-шароитлар яратиш;
👉«Саховат» и «Мурувват» уйлари ҳудудларида видеокузатув камераларини ўрнатиш;
👉 тиббий-ижтимоий муассасалар тарбиячиларининг малака ошириш курсларида малакасини оширишни ташкил этиш ва бошқа муаммоларни ҳал этиш.
Худди шу қарор билан Жиззах вилояти Шараф-Рашидов туманидаги имконияти чекланган болалар мактаб-интернатини хотин-қизлар мактаб-интернатига айлантириш тўғрисида буйруқ берилди. Наманган вилоятидаги «Саховат» пансионати ҳудудида «Кексалар боғи» истироҳат боғи ташкил этилиб, бу ерда ушбу муассасанинг доимий аъзоси бўлмаган қариялар учун пуллик тиббий, ижтимоий ва шахсий хизматлар кўрсатилади.
Кексалар ва ногиронларни ижтимоий мослаштириш ва касб-ҳунарга ўргатиш мактаб-интернатларида уларнинг қизиқишларидан келиб чиққан ҳолда ўқув устахоналари очилади. Улар учун ҳар йили пазандачилик, қандолатчилик, сартарошлик, тикувчилик ва бошқа йўналишларда қисқа муддатли бепул курслар ташкил этилади.
Апрель ойида Ўзбекистонда нуронийларнинг йиллик санаторий-курортларда даволаниши, кам таъминланган кексаларнинг дори-дармон ва ортопедия буюмлари харид қилиш харажатлари давлат томонидан қопланиши хабар қилинганди. Нуронийлар учун спорт иншоотлари, театр ва музейларга ташриф буюриш, мамлакат бўйлаб саёҳат қилиш учун қатор имтиёзлар жорий этилди.
