ИССВ раҳбари Лазиз Қудратов. Ўзбекистон президенти матбуот хизмати фотосурати
Ўзбекистон Республикаси Инвестициялар, саноат ва савдо вазирлиги (ИССВ) ҳузурида Саноат сиёсатини ўрганиш маркази ташкил этилади. Бу ҳақда мамлакат президенти Шавкат Мирзиёев 27 март куни бўлиб ўтган йиғилишда маълум қилди.
Учрашув инвестиция, экспорт ва халқаро ҳамкорлик масалаларига бағишланди. Таъкидланганидек, йил бошидан буён Ўзбекистонда 764 миллион долларлик хорижий сармоя ўзлаштирилган, 1,3 мингта йирик ва ўрта лойиҳа ишга туширилган. Экспорт ҳажми 3 миллиард долларни ташкил этган.
Жорий йил охиригача қарийб 11 миллиард доллар тўғридан-тўғри хорижий инвестициялар ўзлаштирилиши режалаштирилган бўлиб, кейинги йилларда улар деярли ҳар бир туман ва шаҳарга жалб этилади. Ҳудудларда 23 миллиард долларлик 12 мингта янги лойиҳа, жумладан, 3 мингдан ортиқ йирик ва ўрта ишлаб чиқариш объектлари ишга туширилади.
Мирзиёев дунёда вазият ёмонлашгани сабабли Ўзбекистонга ускуналар етказиб бериш ва маҳаллий маҳсулотларни ташқи бозорга олиб чиқиш учун логистика масалаларини ҳал қилиш, хорижий сармояни жалб этиш қийинлашаётганини таъкидлади.
Президент ҳудудлар ва тармоқлар контекстида лойиҳаларни амалга ошириш юзасидан ҳар куни мониторинг олиб бориш, юзага келаётган муаммоларни тезкорлик билан ҳал этиш зарурлигини таъкидлади. Унга кўра, жорий йилда 304 та йирик ва 3000 та ҳудудий лойиҳанинг ишга туширилиши ва якунланиши 10 триллион сўмлик (877 миллион доллар) маҳсулот яратиш ва 200 миллион доллар экспорт қилиш имконини беради.
Йиғилишда таъкидланганидек, сўнгги беш йил ичида Ўзбекистонда:
👉 хорижий корхоналар сони 5 мингтадан 16 мингтага ошган;
👉 экспорт қилувчи корхоналар сони 4,5 мингтадан 7,2 мингтага етган;
👉 экспорт қилинадиган маҳсулотлар ассортименти 1,5 мингтадан қарийб 3 мингтага, экспорт географияси эса 139 тадан 164 тага кўпайган;
👉 тайёр маҳсулот экспорти икки баравар, экспорт тузилмасидаги улуши эса 50 фоиздан 65 фоизга ўсган
Шавкат Мирзиёев ташқи бозорларни доимий равишда таҳлил қилиш, янги бозорларни жадал ривожлантириш имкониятларини излаш ва янги транспорт йўлакларини яратиш, маҳсулот сифатини ошириш ва унинг таннархини пасайтириш бўйича кўрсатмалар берди. Юқори технологияли маҳсулотлар ва қўшимча қийматли маҳсулотларни маҳаллийлаштиришга қаратилган лойиҳаларни молиялаштириш тизимини жорий этиш вазифаси қўйилди.
