"Аркадаг" ФК. turkmenistan.gov.tm сайти фотосурати
«Аркадаг» футбол клуби Туркманистон чемпионатининг сўнгги турида Ашхободнинг «Копетдаг» жамоасини 3:0 ҳисобида мағлуб этди ва турнир якунларига кўра, 24 учрашувда 24 та ғалабага эришди.
«Аркадаг» учун «Копетдаг» устидан қозонилган ғалаба расмиятчиликка айланди – жамоа чемпионат тугашига яна тўрт тур қолганда муддатидан аввал чемпионликни қўлга киритди.
Турнир якунида «Аркадаг» 72 балл тўплади — бу мумкин бўлган максимал рақам. 24 та ўйинда жамоа футболчилари 83 та гол уришди — ҳар бир ўйинда ўртача камида 3 та гол. Жамоанинг энг яхши тўпурари Дидар Дурдиев бўлди: у 27 та гол урди.
Турнирнинг кумуш медалларини 23 учрашувда 51 очко жамғарган ашхободлик «Алтин Асир» қўлга киритди. Бронза учун Болқонободнинг «Небитчи» ва Ашхободнинг «Аҳал» жамоалари кураш олиб бормоқда.
«Аркадаг» барча ўйинларда ғалаба қозониб, максимал очко жамғарди ва иккита чемпионат рекордини ўрнатди.
Илгари ғалабалар сони бўйича энг юқори ютуқ «Небитчи»га тегишли бўлган, 1992 йили 24 учрашувдан 23 тасида ғалаба қозониб, фақат биттасида мағлубиятга учраган. Мумкин бўлган максимал очколар сони бўйича рекорд «Копетдаг»га тегишли бўлиб, 2000 йили 20 учрашувнинг 18 тасида ғалаба қозонган ва яна иккитасида дуранг билан якунланган.
ℹ️ ФК «Аркадаг» ФК жорий йилнинг баҳорида ташкил этилган ва худди шу номдаги янги шаҳарни тақдим этади. Таркиб Туркманистон чемпионатининг энг кучли футболчиларидан шакллантирилган ва жамоа дарҳол республика олий лигасига киритилди.
