Видеодан скриншот
Қозоғистон жануби-ғарбидаги Манғистау вилоятида «Буюк девор» бурғулаш компанияси (Актау) ишчилари президент Қосим-Жомарт Тўқаевга мурожаат қилишди, дея хабар беради «Азаттиқ» (РФда хорижий агент сифатида тан олинган Озодлик радиосининг минтақавий хизмати). Улар иш ўринларининг қисқартирилиши мумкинлигига қарши чиқдилар ва корхонада кенг қамровли текширув ўтказишни талаб қилишди.
Мурожаат муаллифларига кўра, иш ҳажмига қарамай, улар январь ойи бошидан буён мажбуран тўхтаб қолишган (бу ўртача иш ҳақининг ярмини тўлашни назарда тутади) ва корхона раҳбарияти четдан пудратчиларни жалб қилмоқда. Давлат раҳбарига навбатчилик лагеридаги ишчилар учун мўлжалланган биноларнинг эскиргани ҳақида ҳам шикоят қилинган.
Мурожаатдан маълум бўлишича, 8 январь куни касаба уюшмаси вакиллари шаҳар ҳокимлигида корхона раҳбарияти билан учрашган, бироқ улар, жумладан, иш ҳақини ошириш масаласи бўйича келишувга эриша олишмаган. Шу муносабат билан Тўқаевдан вазиятга аралашиб, муаммони ҳал қилишга ёрдам бериш сўралган.
Қозоғистон-Хитой бурғулаш компанияси бўлмиш «Буюк девор» Қаламқас, Бузачи ва Жетибай конларида нефть ва газ қудуқларини бурғулаш ва таъмирлаш бўйича хизматлар кўрсатади.
Сўнгги бир ой ичида Манғистаудаги иккинчи корхона ишчилари президентга ёрдам сўраб мурожаат қилишди. Декабрь ойида «West Oil Software» нефть хизматлари компаниясининг 500 га яқин ходими Тўқаевга бир нечта мурожаатларни ёзиб, иш ташлашга чиқишганди. Иш ташлаш суд томонидан ноқонуний деб топилганига ва ишчиларнинг бир қисми ишдан бўшатилганига қарамай, акция шу кунгача давом этмоқда. Акция иштирокчилари «КазМунайГаз» миллий компанияси таркибига қўшилишни истайди, шунингдек, уларга ягона иш ҳақи тизимини жорий этиш, моддий-техника базасини янгилашни талаб қилишмоқда.
