championat.com сайти фотосурати
Ўзбекистоннинг тўртта клуби, шунингдек, Тожикистон ва Туркманистон жамоалари Чемпионлар лигасининг 2023/2024 йилги мавсумида иштирок этгани учун жами 2,08 миллион доллар ишлаб олди.
Марказий Осиё жамоалари орасида Наманганнинг «Навбаҳор» жамоаси пешқадам бўлган – 600 минг доллар, Қаршининг «Насаф»и эса бироз камроқ – 520 минг доллар ишлаб олган. Тошкентнинг «Пахтакор» клуби иштирок учун 290 минг доллар, Олмалиқнинг АГМК (ОКМК) эса 220 минг доллар олган. Ашхободнинг «Аҳал» клуби 240 минг доллар, Душанбенинг «Истиқлол» клуби эса 210 минг доллар олган.
Футбол бўйича мутахассис Алишер Никимбаев «Футболиум» Телеграм каналида аниқлик киритишича, Чемпионлар лигасида даромаднинг учта асосий тури мавжуд: ташриф учун субсидиялар, иштирок учун тўловлар ва ютуқлар учун бонус.
Ташриф субсидиялари ҳар бир сафар ўйини учун тўланади: дастлабки босқич ва плей-офф ўйини учун 40 минг доллар, гуруҳ босқичи ўйини ва 1/8 финал учун 60 минг доллар.
Иштирок этганлик учун тўловлар 1/8 финалдан бошлаб ҳисоблаб чиқилади, шунинг учун Марказий Осиё клубларидан фақат «Навбаҳор» ва «Насаф» жамоаларининг ҳар бири 100 минг доллардан пул олган.
Муваффақият бонуси ҳар бир ғалаба ($50 минг) ёки дуранг ($10 минг) учун тўланади.
Эслатиб ўтамиз, Марказий Осиёнинг барча клублари ОЧЛдаги иштирокини якунлади. Марказий Осиёдан халқаро клуб турнирларида иштирок этишда давом этаётган ягона жамоа бу Кантнинг «Абдиш-Ата» жамоаси бўлиб, у 6 март куни зоналараро ярим финалда Тайваннинг «Туйчжунг Футуро» жамоасига қарши курашади.
