2023 йил ёзида Германияда қўлга олинган Марказий Осиё давлатларининг етти нафар фуқароси терроризмга алоқадорликда айбланган. Бу ҳақда Германия Федерал прокуратураси хабар берди.
Қўлга олинганлар орасида Туркманистон фуқароси Ата А., Қирғизистонлик Аброржон К. ва Тожикистоннинг беш фуқароси: Муҳаммадшужо А., Нуриддин К., Шамшуд Н., Саид С. ва Рабони З. лар бор.
«Уларни террорчилик ташкилоти тузиш ва унда иштирок этишда гумон қилиш учун етарли асослар бор», — дейилади прокуратура баёнотида.
Бундан ташқари, Муҳаммадшужо A.дан ташқари қолганлари «Исломий давлат»* (ИШИД) террорчилик ташкилотини қўллаб-қувватлашда айбланмоқда. Улар 2022 йил апрелидан 2023 йил майигача ИШИД учун пул йиғиб, ташкилотнинг хориждаги эмиссарларига жами бир неча минг евро берган. Шу нуқтаи назардан, Шамшуд Н., Нуриддин К., Аброржон К., Ата А. ва Саид С. ҳам ташқи савдо қонунчилигини бузганликда айбланмоқда. Уларга 28 март куни Дюссельдорфдаги Олий минтақавий судда айблов эълон қилинди.
Прокуратуранинг таъкидлашича, юқорида тилга олинган барча айбланувчилар «бир-бирини узоқ вақтдан бери билишади ва радикал исломий қарашларга эга». 2022 йил баҳорида улар деярли бир вақтнинг ўзида Украинадан Германияга келишган. Ўша йил июнь ойи охирида улар бир-бири билан ва Голландияда яшовчи Тожикистон фуқароси билан бирлашган, кейинчалик у бошқалар билан бир кунда — 2023 йил 6 июлда ҳибсга олинади. Гуруҳнинг мақсади Германия ёки Ғарбий Европанинг бошқа давлатларида «ИШИД руҳидаги шов-шувли терактлар»ни амалга ошириш мақсадида террорчи ташкилот тузиш бўлган.
«Гуруҳ «Исломий давлат»нинг минтақавий бўлими «ИШИД-Хуросон»*нинг хориждаги аъзолари билан алоқада бўлган. Ўз режаларини амалга ошириш учун айбланувчилар мунтазам равишда турли таркибда учрашишган, Германиядаги ҳужум нишонларини кўздан кечиришган ва содир бўлиши мумкин бўлган жиноят жойларини қидиришган. Шунингдек, улар қурол сотиб олишга ва ҳужумлар учун донорлар топишга ҳаракат қилишган. Ҳуқуқ-тартибот идоралари аралашуви вақтида уларда аниқ ҳужум режаси йўқ эди», — дейди федерал прокуратура.
👉 Эслатиб ўтамиз, «ИШИД Хуросон» террор ташкилоти жорий йил 22 март куни Москва яқинидаги «Крокус Сити Холл» концерт залида содир этилган ва 144 кишининг ҳаётига зомин бўлган теракт учун жавобгарликни ўз зиммасига олган.
ℹ️ Бу Марказий Осиё давлатлари фуқароларининг Германияда терактлар тайёрлашда айбланиб, илк бор ҳибсга олиниши эмас. Шундай қилиб, 2022 йил май ойида Дюссельдорфда Тожикистоннинг беш фуқароси ИШИД фаолиятига алоқадорлик айби билан 3,8 йилдан 9,6 йилгача бўлган муддатга қамоқ жазосига ҳукм қилинган.
ℹ️ Жорий йил март ойи бошида Тожикистон президенти Эмомали Раҳмон сўнгги уч йил ичида унинг 24 нафар ватандоши дунёнинг ўнта давлатида терактлар содир этганини айтганди. Мамлакатнинг ўзида, давлат раҳбарининг сўзларига кўра, 10 йил давомида 86 та теракт ва суиқасд содир этилган.
*РФ ва кўпгина давлатларда террорчи сифатидан тан олинган ва тақиқланган ташкилот (Россия қонунчилиги талаби бўйича изоҳлаб ўтамиз).
