Иордания – Тожикистон ўйинидан лавҳа. the-afc.com сайти фотосурати
Тожикистон терма жамоаси ЖЧ-2026 иккинчи саралаш босқичининг бешинчи тури доирасидаги ўйинда Иордания терма жамоасига меҳмонда 0:3 ҳисобида имкониятни бой бериб, учинчи саралаш босқичига чиқиш имкониятидан маҳрум бўлди.
Гуруҳдан чиқиш имкониятларини сақлаб қолиш учун тожикистонликлар Иордания билан ўйинда ютқазмаслиги керак эди. Дуранг саралашнинг назарий имкониятларини қолдирарди, бироқ ғалаба Марказий Осиё терма жамоасини ўз эзгу мақсадига яқинлаштирган бўларди. Саудия Арабистони гуруҳда биринчи ўринни қўлга киритгани боис, Иорданияга ҳам ғалаба керак эди.
Биринчи бўлим меҳмонларнинг катта устунлиги остида ўтди. Тожикларда ҳисобни очиш учун бир қанча ажойиб имкониятлар бўлди, бироқ гоҳ рақиб дарвозабони муваффақиятли ўйнади, гоҳида қулай вазиятдаги футболчилар тўпни ўтказиб юборишди. Иккинчи бўлим бошида меҳмонлар яна бир нечта хавфли вазиятлар яратишди, аммо уларни голга айлантира олишмади. «Агар сен гол урмасанг, улар сенга гол уришади» деган машҳур футбол қоидаси шу ерда иш берди. 51-дақиқада иорданияликларнинг биринчи голига Али Олван муаллифлик қилди. 17-дақиқада Язан Ал Наимат ҳисобдаги фарқни оширди. 80-дақиқадан кейин тожикистонликлар мезбонлар дарвозаси томон ҳужум қилишди, лекин яна бир қанча қулай вазиятлардан фойдалана олишмади. Учрашувдаги якуний нуқтани Иброҳим Садеҳ қўйди. 3:0 Иордания фойдасига.
G гуруҳидаги яна бир учрашувда Саудия Арабистони меҳмонда Покистонни 3:0 ҳисобида мағлуб этди.
G гуруҳида 5 турдан кейин вазият қуйидагича: Саудия Арабистони – 13 очко, Иордания – 10, Тожикистон – 5, Покистон – 0.
11 июнь куни бўлиб ўтадиган сўнгги турда Тожикистон меҳмонда Покистонга, Иордания эса сафарда Саудия Арабистонига қарши баҳс олиб боради ва ғалаба қозонса, гуруҳда биринчи ўринни эгаллайди.
Тошкентда Е гуруҳи доирасида Марказий Осиё дербиси бўлиб ўтди – Ўзбекистон терма жамоаси Туркманистон терма жамоасини қабул қилди. Мезбонлар кейинги босқичга чиқишни кафолатлаган эди, бироқ туркманистонликлар саралашда иштирок этишни давом эттириш имкониятидан маҳрум бўлишди. Аммо Ўзбекистон миллий терма жамоаси бош мураббийи Сречко Катанец энг кучли футболчиларни ўз сафига чорлади ва унинг жамоаси 3:1 ҳисобида ғалаба қозонди.
Бутун ўйин давомида ташаббус Ўзбекистон жамоасида бўлди. Учрашувнинг 17-дақиқасида бурчак тўпидан сўнг Хусниддин Алиқулов ҳисобни очди. Бироқ 25-дақиқада меҳмонлар тезкор қарши ҳужум уюштиришди ва бу ҳужум Шаназар Тиркишовнинг голи билан якунланди. Аммо орадан тўрт дақиқа ўтиб Остон Ўрунов яна Ўзбекистонни олдинга олиб чиқди. Учинчи гол 70-дақиқада Рустем Аҳаллиев дарвозасига Шерзод Насруллаев томонидан киритилди.
Гуруҳдаги яна бир учрашувда Эрон Гонконгни 4:2 ҳисобида мағлуб этди.
Беш турдан кейин Е гуруҳидаги турнир жадвали: Эрон – 13 очко, Ўзбекистон – 13, Туркманистон – 1, Гонконг – 1.
Иккинчи саралаш босқичининг сўнгги турида Эрон Ўзбекистонни, Туркманистон Гонконгни қабул қилади.
Бишкекда Қирғизистон терма жамоаси малайзияликларни мағлуб эта олмади ва жаҳон чемпионати саралашининг кейинги босқичига муддатидан олдин йўлланмани кафолатлай олмади. Учрашув 1:1 ҳисобида якунланди.
Рақиблар эҳтиёткорлик билан ўйнашди ва таваккал қилмасликка ҳаракат қилишди. Бироқ, ҳатодан ҳеч ким қочиб қутулолмади. Мезбонлар 24-дақиқада ҳисобда олдинга чиқиб олишди ва голга Гулжигит Алиқулов муаллифлик қилди. Бироқ, орадан чорак соат ўтиб, малайзияликлар томонидан бурчак тўпи амалга оширилган вақтда Одил Абдураҳмонов тўпни ўз дарвозасига йўллади. Томошабинлар бошқа киритилган голларни кўришмади.
Параллел ўйинда Уммон терма жамоаси Тайванни 3:0 ҳисобида мағлуб этди.
D гуруҳида бешта ўйиндан сўнг вазият қуйидагича: Уммон – 12 очко, Қирғизистон – 10, Малайзия – 7, Тайван – 0.
Сўнгги турда Қирғизистон Уммонга ташриф буюрса, Малайзия Тайванни қабул қилади.
Қирғизистон терма жамоаси ўз тарихида илк бор жаҳон чемпионатининг учинчи саралаш босқичига чиқиш учун Уммонга ютқазмаслиги ёки Малайзиянинг Қирғизистондан бой берган голлардаги фарқни Тайванга қарши бахсда тиклаб олмаслиги учун хавфни минималлаштириш учун имкон қадар камроқ гол ўтказиб юборишга ҳаракат қилиши керак. Оддий қилиб айтганда, Қирғизистон бир тўп фарқи билан мағлуб бўлса, Малайзия муваффақият қозониши учун Тайванни камида олтита тўп фарқи билан мағлуб этиши керак.
