Нурали Киясов ва Арман Кудайбергенов. ztb.kz фотосурати
Қозоғистонлик фигурали учувчи Денис Теннинг ўлдирилиши бўйича судланганлар Олий судга кассация шикояти берди, деб ёзади Tengrinews.kz. Уни кўриб чиқиш 2024 йил 8 августга белгиланган.
Олий суднинг аниқлик киритишича, уларга судланган Арман Кудайбергенов ва Нурали Киясовлар манфаатларини ҳимоя қилувчи адвокатдан кассация шикояти келиб тушган. Судда бошқа тафсилотлар айтилмаган. ORDA.kz хабарига кўра, ҳимоячи маҳкумларнинг тўлиқ айбсиз эканини таъкидламоқда.
2018 йил 19 июлида Олмаота шаҳрида бронза медали соҳиби, Олимпия ўйинлари чемпиони, кўплаб халқаро турнирлар ғолиби Денис Тен ўлдирилган. Машинадан кўзгуларни ўғирламоқчи бўлган жиноятчилар томонидан спортчи пичоқ билан оғир яраланган. Кўп қон йўқотгани туфайли шифокорлар спортчини сақлаб қолишолмаган. Жиноят Қозоғистонда катта резонансга сабаб бўлган, полициянинг танқид остида қолиб кетишига ва мамлакат Ички ишлар вазирлиги раҳбариятини истеъфога чиқиши учун чақириқлар янграшига сабаб бўлган.
Тез орада ҳужум қилганлар Арман Кудайбергенов ва Нурали Киясов қўлга олинган. 2019 йил бошида суд уларни 18 йилга озодликдан маҳрум қилган, бошқа бир айбланувчи, талончилардан бирининг таниши Жанар Толибаева жиноят ҳақида хабар бермагани учун тўрт йил муддатга озодликдан маҳрум этилган (кейинчалик муддат қисқартирилган ва қамоқдан озод қилинган).
Шу йилнинг июль ойида қотилларнинг жазоси енгиллаштирилгани маълум бўлди. Улар ўртача хавфсизлик муассасасига ўтказилган ва тергов изоляторидаги вақтлари ҳам ҳисобга олинган.
