Михаил Мишустин ва Абдулла Арипов. Ўзбекистон Бош вазири матбуот хизмати фотосурати
Тошкентда Ўзбекистон ва Россия ҳукумат раҳбарлари даражасидаги қўшма комиссия йиғилиши бўлиб ўтди, унда кенг кўламли масалалар – йирик иқтисодий лойиҳалардан тортиб, гуманитар соҳадаги шериклик муносабатларигача муҳокама қилинди. Музокаралар ҳақида Ўзбекистон Бош вазири Абдулла Арипов матбуот хизмати хабар берди.
Ўзбекистон ҳукумати раҳбари россиялик ҳамкасби Михаил Мишустинга ташриф учун миннатдорлик билдириб, мамлакатлар ўртасидаги фаол ҳамкорлик давом этаётганини таъкидлади. Хусусан, Ариповнинг сўзларига кўра, сўнгги етти йилда ўзаро товар айирбошлаш ҳажми 2,5 баробар ошган. Ўтган йил охирида бу кўрсаткич 10 миллиард доллардан ошган, 2024 йилнинг етти ойида эса яна 30 фоизга ошган. Ўзбекистонлик сиёсатчи айни пайтда юқори қўшимча қийматга эга маҳсулотлар етказиб бериш кўпаяётганини таъкидлади. У Мишустинга ҳар икки давлат президентлари яқин келажакда товар айирбошлаш ҳажмини 30 миллиард долларга етказиш мақсадини қўйганини эслатди.
«Россия Федерацияси бизнинг асосий ташқи иқтисодий ҳамкоримиз ва энг йирик сармоявий шерикларимиздан бири бўлиб қолмоқда», — деди Арипов.
Бош вазир Ўзбекистонда уч мингдан ортиқ қўшма корхона фаолият юритаётганини, лойиҳа портфели эса 60 миллиард доллардан ошганини таъкидлади.
Транспорт соҳасида ҳамкорлик жадал ривожланмоқда, ҳар икки давлатга ўз товарлари бозорларини кенгайтириш имконини берадиган янги йўлаклар ишлаб чиқилмоқда.
Тўғридан-тўғри рейслар частотаси ҳафтасига тахминан 300 рейсни ташкил қилади. Ўзбекистон бошқа ҳеч бир давлат билан бундай кўрсаткичга эга эмас, деди Арипов.
У, шунингдек, сайёҳлар оқимининг ўсишини таъкидлаб, ўтган йили рекорд ўрнатилганига аниқлик киритди — республикага 700 мингдан ортиқ россиялик ташриф буюрган.
Мишустин, ўз навбатида, ҳамкасбига меҳмондўстлиги учун миннатдорлик билдириб, мамлакатлар турли даражаларда, жумладан, минтақавий ўзаро фаол ҳамкорлик қилаётганини қўшимча қилди. Россия Федерацияси Бош вазири ўзининг савдо айланмаси бўйича статистик маълумотларини келтирди. Ушбу маълумотларга кўра, 2023 йили савдо ҳажми 820 миллиард рублга етган бўлса, 2024 йилнинг биринчи ярмида бу кўрсаткич деярли 9 фоизга ошган.
Юқори мартабали меҳмоннинг сўзларига кўра, мамлакатлар кўплаб йўналишлар, жумладан, сармоявий ҳамкорликни давом эттиради. Мисол тариқасида у «Росатом» давлат корпорацияси билан тинч атом энергетикаси бўйича олиб борилаётган ишларни, Ўзбекистонда Россиянинг йирик ритейлерлари, хусусан, электрон тижоратни ривожлантираётганларини келтириб ўтди.
Россия ҳукумати раҳбари
томонлар полимерларни қўшма ишлаб чиқаришни ташкил этиш ва фуқаро учувчисиз учиш тизимлари ва уларнинг таркибий қисмларини маҳаллийлаштириш имкониятлари ўрганилаётганини маълум қилди.
«Ўзбекистонда темир йўл машинасозлиги соҳасида ишлаб чиқариш қувватларини яратиш бўйича фундаментал қарор қабул қилинди», — дея хулоса қилди Мишустин.
Бош вазир ўзаро сайёҳлар оқими ошганини тасдиқлади. Унинг сўзларига кўра, ўтган йили бу кўрсаткич икки баробарга ошган – 1,2 миллион кишига. Шу йилнинг биринчи ярмида у яна 12% кўпайган. Сиёсатчи прогнозларига кўра, Россияда Ўзбекистон Туризм йили ўтказилиши ҳамда Тошкент ва Москва ўртасида темир йўл қатновининг қайта тикланиши муносабати билан ижобий динамика давом этади.
Арипов ва Мишустин ўртасидаги учрашувда қуйидаги ҳужжатлар имзоланди:
✅ Россия ва Ўзбекистон ҳукумат раҳбарлари даражасидаги Қўшма комиссиянинг бешинчи йиғилиши якунлари бўйича қўшма коммюнике;
✅ Россия Федерацияси Ҳукумати ва Ўзбекистон Республикаси Ҳукумати ўртасида «Агроэкспресс» тезлаштирилган темир йўл ташишларини ташкил этиш лойиҳасини амалга ошириш бўйича ҳамкорлик тўғрисидаги битим.
✅ Россия Федерацияси Ҳукумати ва Ўзбекистон Республикаси Ҳукумати ўртасида тиббий мақсадларда фойдаланиш учун дори препаратлари (дори воситалари) нинг ёрлиқ кодлари тўғрисидаги маълумотларни узатиш мақсадида ахборот ҳамкорлиги тўғрисидаги битим.
✅ Россия Федерацияси Соғлиқни сақлаш вазирлиги ва Ўзбекистон Республикаси Соғлиқни сақлаш вазирлиги ўртасида тиббиёт ходимларини тайёрлаш, қайта тайёрлаш ва уларнинг малакасини ошириш соҳасидаги баённома.
