depositphotos.com сайти фотосурати
Қозоғистон Сенати (парламент юқори палатаси) ялпи мажлисда Қозоғистон ва Қатар ҳукуматлари ўртасида ҳарбий ҳамкорлик тўғрисидаги битимни ратификация қилишни маъқуллади, деб ёзади Tengrinews.kz.
Қонун лойиҳасини сенатор Галиасқар Сарибаев ҳамкасбларига тақдим этди. Шартноманинг ратификация қилиниши икки давлат ўртасида ҳарбий таълим, ҳарбий тайёргарлик, ҳарбий тиббиёт, ҳарбий фан, маданий ва спорт тадбирлари соҳасида ҳамкорлик қилиш имконини беради», — деди у.
Шу жумладан, келишув икки давлатнинг ҳарбий полигонларидан жанговар тайёргарлик ва техника транзити учун ўзаро фойдаланиш имконини беради. Ушбу қоида келишувни парламентнинг қуйи палатаси мажлисида муҳокама қилиш чоғида баҳс-мунозараларга сабаб бўлганди. Шундан сўнг депутат Бахитжан Базарбек унинг амалийлигига шубҳа билдирганди.
«Шартноманинг бешинчи моддасига кўра, Қозоғистон ва Қатар ўз ҳарбий полигонларидан фойдаланиши мумкин. Қозоғистонда кўплаб ҳарбий полигонлар бор, Қатарда эса йўқ. Гап шундаки, у ерда ҳарбий база бор. Айтинг-чи, Қатарда қандай ҳарбий полигонлар бор? Уларнинг қўшинлари йўқ, 80 фоизини хорижлик ҳарбийлар ташкил этади, келишув тасдиқланса, у КХШТ келишувига қандай мос келади?», — дея унинг сўзларини келтиради Orda.kz.
Бунга жавобан Мудофаа вазири ўринбосари Дархан Ахдиев Қозоғистон яқин келажакда Қатар объектларидан фойдаланишни режалаштирмаётгани, аксинча, қатарлик ҳарбий хизматчиларга Қозоғистон полигонларида машғулот ўтказиш имкониятини тақдим этиши ва бу мавжуд шартномаларга дахлсиз эканига ишонтирди.
Депутатлар қўллаб-қувватлаган келишувда қўшма машғулотлар ўтказиш, тинчликпарвар операцияларда маслаҳатлашувлар ўтказиш, ҳаво ҳудудидан ўзаро фойдаланиш ҳам назарда тутилган. Бундан ташқари, икки давлат ҳарбийлари ўзаро тажриба алмашадилар. Қозоғистон Республикаси ТИВ раҳбари ўринбосари Алибек Бақаевнинг сўзларига кўра, аскарлар тўрт тилда: инглиз, қозоқ, рус ва араб тилларида ўзаро алоқада бўлишади (бунинг учун, деб ёзади Orda.kz, қозоқ ҳарбийларини арабчага ўргатиш бошланади).
Икки давлат ҳукуматлари 2023 йил декабрь ойида Доҳада ҳарбий ҳамкорлик тўғрисидаги битимни имзолаган эди. У беш йил давомида амал қилади ва ҳар икки томоннинг розилиги билан автоматик равишда узайтирилади.
