Хайрулло Бозоров йиғилишда. Ўзбекистон президенти матбуот хизмати фотосурати
Фарғона вилоятининг Бешариқ тумани ва Қувасой шаҳрида эркин савдо зоналари ташкил этилиши режалаштирилган. Бу ҳақда 3 декабрь куни Ўзбекистон Президенти Шавкат Мирзиёев раислигида вилоятни ижтимоий-иқтисодий ривожлантириш, сармоявий муҳит ва ишбилармонлик муҳитини янада яхшилаш чора-тадбирларига бағишланган йиғилишда сўз юритилди.
Бешариқ тумани Тожикистон билан чегарадош. Бу ерда савдо-логистика маркази қурилиши бошланган бўлиб, у Афғонистон билан чегарадош Термиз шаҳрида фаолият юритаётган эркин савдо ҳудудига ўхшайди. Бу вилоят экспортини қўшимча 50 миллион долларга ошириш ва 2 минг иш ўрни яратиш имконини беради. Худди шу мажмуа Қирғизистон билан чегарага яқин жойлашган Қувасойда ҳам қурилиши режалаштирилган.
Йиғилишда сўнгги етти йилда Фарғона вилоятида саноат корхоналари сони қарийб уч баробар кўпайиб, 13 мингтага етгани таъкидланди. Бу 116 минг иш ўрни яратган инвестиция лойиҳалари эвазига амалга оширилди. Жорий йилнинг 10 ойида вилоятга киритилган хорижий инвестисиялар ҳажми 1,5 миллиард долларни, экспорт ҳажми эса 910 миллион долларга етди.
Мирзиёев вилоятда сармояни кўпайтириш ва янги иш ўринлари яратиш зарурлигини таъкидлади. Хусусан, «Қўқон» эркин иқтисодий зонаси 210 гектарга кенгайтирилиб, унда умумий қиймати 1 миллиард доллар бўлган 185 та лойиҳа амалга оширилиши, 12 мингга яқин иш ўрни яратилишини таъкидлади. Шунингдек, Қўқон шаҳрида 71 гектар майдонда технопарк ташкил этиш, бу ерда умумий қиймати 900 миллион доллар бўлган корхоналар ва 5 минг иш ўрни яратиш режалаштирилган.
Хитойлик ишбилармонлар билан 1 миллиард долларлик, Жанубий Корея билан 240 миллион долларлик инвестициявий келишувларга эришилган. Уларни амалга ошириш учун вилоят туман ва шаҳарларида 1 минг 210 гектарда саноат зоналари ташкил қилишга зарурат бор. Бўлажак корхоналарда 30 минг киши, жумладан, камбағал оила вакиллари иш билан таъминланади.
Йиғилишда қишлоқ хўжалигини ривожлантириш имкониятлари ҳам муҳокама қилинди. Фарғонада қишлоқ хўжалиги маҳсулотлари етиштириш ва қайта ишлашни кўпайтиришда самарали фойдаланиш мумкин бўлган 91 минг гектар ер мавжуд. Масалан, Фарғона вилоятида йилига 6 минг тонна малина етиштирилади, уларни сақлаш ва қайта ишлаш ҳисобига қўшимча қийматни ошириш таклифи билдирилди.
Фарғона вилояти ҳокими Хайрулло Бозоров келгуси йили 3,7 миллиард долларлик инвестиция олиб келиш ва экспорт ҳажмини 1,5 миллиард долларга етказиш бўйича режаларни тақдим этди. Мирзиёев бу таклифларни такомиллаштириб, вилоят иқтисодиётини ривожлантириш бўйича қарор тайёрлашга кўрсатма берди. Экспортчиларга барча қулайликларни яратиш, бандликка кўмаклашиб, ишсизликни камайтириш зарурлиги таъкидланди.
