Юруслан Тойчубеков. 24.kg сайти фотосурати
Қирғизистон Миллий хавфсизлик давлат қўмитаси (МХДҚ) Молия бозорини тартибга солиш ва назорат қилиш давлат хизматининг собиқ раиси Юруслан Тойчубековни MCN Coin иши бўйича ҳибсга олди. Бу ҳақда 24.kg нашри хабар берди.
MCN Coin – бу Қирғизистоннинг «Бирик Туран» компанияси томонидан ишга туширилган виртуал актив ҳисобланади. 2024 йил март ойидан бери компания бир неча бор MCN Coin криптовалютасини рўйхатдан ўтказиш учун Давлат молия назорати хизматига мурожаат қилишга уриниб кўрган, бироқ мамлакатнинг виртуал активлар бозори соҳасидаги қонунчилиги талабларига риоя қилинмагани сабабли рад жавобини олган. Бироқ, MCN Coin муомалага чиқарилган, шу муносабат билан Давлат молия назорати хизмати Ички ишлар вазирлигига мурожаат қилган ва у ерда терговга қадар текширув ишлари бошланган. Мазкур ҳолат юзасидан «Фирибгарлик» моддаси бўйича жиноят иши қўзғатилган, Бишкек шаҳрининг Первомайский ва Октябрь туманлари ИИБ томонидан тергов ҳаракатлари олиб борилмоқда.
2024 йил декабрь ойида Октябрь тумани ички ишлар бошқармаси MCN Coin билан боғлиқ рағбатлантирувчи лотерея ўйини ўтказилишининг қонунийлиги тўғрисида тушунтириш олиш учун Давлат молия назорати хизматига мурожаат қилган. Ҳуқуқ-тартибот идоралари ходимларига бундай лотерея ўйини ўтказиш учун рухсат берилмагани айтилиб, MCN Coin эмитентига ва лотерея ташкилотчиларига қонунда белгиланган тартибда чора кўриш сўралган.
Февраль ойи бошида виртуал актив асосчиларидан бири Исрадин Субанбеков ҳибсга олинган. У Рисқул Болотбеков ва Мухтор Бегмат уулу билан биргаликда «криптовалюта»ни яратганини ва бу борада уларга Давлат молиявий назорат хизматининг собиқ раҳбари Юруслан Тойчубеков ёрдам берганини айтган.
«MCN Coin бир ярим йилдан бери ишлайди. У ўз блокчейнига эга эмас. Биз бир амаллаб биржага кирдик. Шахсий манфаатлар йўлида ишлаганмиз. Бу вақт давомида мен ўзимга Lexus 570 автомобили ва элита квартира сотиб олдим. Жами 2,5 миллион долларга яқин фойда олдик», — деган Субанбеков.
Унинг сўзларига кўра, гуруҳ асосчилари Қирғизистоннинг барча вилоятларини кезиб чиққан.
«Давлат молия назорати органи бизни беш марта рўйхатдан ўтказишдан бош тортди. Шунга қарамай, биз ноқонуний ишладик. Биз энди одамларга пулларни қайтариб беролмаймиз. Акциялар борасида ёлғон гапирганмиз. Бу фирибгарлик эди», — деган Субанбеков ва алданган қирғиз фуқароларидан кечирим сўраган.
Кейинчалик, Ички ишлар вазирлиги MCN Coin асосчилари ҳаракатларидан жабр кўрганларга жами 1,7 миллион доллар қайтарилганини маълум қилди, 10 февралга келиб, 898 киши ушбу «криптовалюта» га тикилган пулларини қайтариб олган.
