khovar.tj сайти иллюстрацияси
Тожикистон Олий суди давлат тўнтаришига уриниш бўйича судланувчиларнинг кассация шикоятларини кўриб чиқиб, суд ҳукмларини ўзгаришсиз қолдирди. Бу ҳақда суд жараёни иштирокчилари ва маҳкумларнинг яқинларига таяниб, «Азия-Плюс» хабар берди.
Нашрнинг ёзишича, кассация мажлислари 1 ва 2 апрель кунлари Душанбедаги тергов изоляторида ёпиқ эшиклар ортида бўлиб ўтган. Биринчи суд мажлиси уч соат давом этган, шундан сўнг судя жараённи эртанги кунга қолдирган. 2 апрель, чоршанба куни тергов изоляторида ҳокимиятни зўравонлик йўли билан эгаллаб олишга уринганликда айбланиб, узоқ муддат қамоқ жазосига ҳукм қилинган сиёсатчиларнинг шикоятларини яна бир бор ўрганиб чиқилган. Охир-оқибат, адвокатлар журналистларга хабар берганидек, Олий суд иш бўйича айбланувчилар шикоятларини рад этишга қарор қилган.
Адвокатлардан бири барча маҳкумлар ва уларнинг ҳимоячиларига сўзга чиқиш ва ўз далилларини келтириш ҳуқуқи берилганини қўшимча қилган. Улар биринчи инстанция ҳукмини қайта кўриб чиқишни сўрашган, бироқ Олий суд ҳукмларни ўз кучида қолдирган.
Маҳкумлардан бирининг қариндоши Олий суд қарорини тасдиқлаб, маҳбусларнинг озод этилишини кутмаган бўлса-да, уларнинг жазо муддати қисқартирилишига умид қилганини айтган.
«Энди улар омон қолсалар, 90 ёки 100 ёшида озодликка чиқадилар», — деб куйинган «Азия-Плюс» суҳбатдоши.
ℹ️ Давлат тўнтаришига уриниш иши бўйича суд 5 февраль куни Душанбедаги тергов изоляторида бўлиб ўтди. Энг узоқ муддат – 27 йиллик қамоқ жазоси Тожикистон Ташқи ишлар вазирлиги собиқ раҳбари Ҳамрохон Зарифий ва Демократик партиянинг собиқ раиси Саиджафар Усмонзодага берилди. Республика Давлат хавфсизлик қўмитасининг истеъфодаги полковниги Жамшед Бобоев 21 йилга, Демократик партия раҳбарининг собиқ ўринбосари Аҳмадшоҳ Комилзода эса 19 йилга озодликдан маҳрум этилди.
Олий суднинг собиқ раиси Акбаршоҳ Искандаров, Социал-демократик партия раиси ўринбосари Шокиржон Ҳакимов ва Давлат хавфсизлик қўмитасининг истеъфодаги полковниги Нураҳмад Ғанизода 18 йилга озодликдан маҳрум этилди. Журналист Рухшона Ҳакимова 8 йиллик қамоқ жазосига ҳукм қилинди.
Қайд этилишича, судланувчиларнинг аксарияти давлатга хиёнат ва ҳокимиятни эгаллаб олишга уриниш моддалари бўйича айбдор деб топилган.
Ҳукм эълон қилинганидан бир неча кун ўтгач, биринчи шикоят Олий судга келиб тушган. Кейин қолган айбланувчилар ҳукм устидан шикоят қилишган. Барча адвокатлар 17 февралгача ҳужжатларни топширганлар, яъни улар қонунда белгиланган муддатда улгуришган.
