Светлана Герасименко ўзи кашф этган комета макети билан. Ижтимоий тармоқ фотосурати
Чурюмов-Герасименко кометасини кашф этган астрофизик олима Светлана Герасименко 8 апрель куни 81 ёшида вафот этди. Бу ҳақда Тожикистон Миллий фанлар академияси (МФА) Астрофизика институти хабар берди.
«Светлана Ивановна Герасименко совет ва тожик астрономияси тарихидаги кўзга кўринган намояндаларидан бири, 67П/Чурюмов-Герасименко кометасининг кашфиётчиси, илмий ютуқлари учун 2017 йили Абу Али ибн Сино номидаги Тожикистон Республикаси Давлат мукофоти билан тақдирланган. Ўз мамлакати сарҳадидан ташқарида ҳам илмий жамоатчилик эътирофига сазовор бўлган Светлана Ивановна Герасименко бир қатор халқаро астраномия ташкилотлари аъзоси бўлган», — дейилади хабарда.
Светлана Герасименко 1945 йил 23 февралда Киев вилоятида (Украина) туғилган. 1968 йили Киев давлат университетининг астрономия факультетини тамомлаб, Украина ССР Фанлар академиясининг Астрономия расадхонаси қошидаги аспирантурага ўқишга кирган.
1969 йил сентябрь ойида худди шу расадхона ходими Клим Чурюмов билан Герасименко илмий экспедицияда иштирок этиш учун Олма-Отага учиб кетади. Унинг мақсади 32П/Комас-Сола кометасини кузатиш бўлган, бунинг учун 50 сантиметрлик телескоп ишлатилган. 11 сентябрдан 12 сентябрга ўтар кечаси олимлар янги объект — аввал номаълум бўлган кометани топадилар. У рўйхатга олинган ва уни кашф этган астрономлар шарафига номланган: 67П / Чурюмов-Герасименко кометаси.
1973 йили Светлана Ивановна Тожикистон Миллий Фанлар Академияси Астрофизика Институтида илмий ходим лавозимига таклиф қилинади ва олима бу ерда узоқ йиллар ишлайди. 1982 йили совет астрономи Николай Черних томонидан кашф этилган астероид (3945 Герасименко) унинг шарафига номланган.
2003 йили «Хаббл» телескопи 67П/Чурюмов-Герасименко кометасини суратга олади, бунинг асосида унинг уч ўлчамли тасвири яратилади ва унинг ўлчамлари 3 дан 5 км гача экани аниқланади. 2004 йил март ойида Светлана Герасименко Клим Чурюмов билан биргаликда Франция Гвианасидаги Куру космодромидан Европа сайёралараро космик кемаси «Розетта» учирилишида қатнашади. «Розетта» экспедицияси 2016 йил 30 сентябрда якунланган.
