Троллейбус линияларини демонтаж қилиш ОТБнинг Қирғизистон пойтахтига жамоат транспортини ривожлантириш учун кредит ва грант ажратиш шартларига киритилмаган. Бу ҳақда «Бишкек СМОГ» шаҳар ташаббуси томонидан олинган Осиё тараққиёт банкининг расмий жавобида айтилади, деб ёзади Kaktus.Media.
ОТБнинг таъкидлашича, Бишкекдаги шаҳар транспортларини электрлаштириш лойиҳаси (Urban Transport Electrification Project, UTEP) бутун троллейбус тармоғини алмаштириш сифатида эмас, балки мавжуд троллейбус паркига қўшимча сифатида ишлаб чиқилган. Лойиҳанинг мақсади экологик тоза транспорт улушини ошириш орқали Қирғизистон пойтахтида ҳаво сифатини яхшилашдан иборат бўлган. UTEP лойиҳасида атиги 25 та эскирган троллейбус ва хизмат муддати тугаган 95 та дизел автобусларини алмаштириш режалаштирилган.
120 та янги электробуслар Бишкекда тоза транспорт улушини ошириши керак бўлган, троллейбусларни йўқ қилиш эмас, улардан воз кечиш ҳокимиятнинг бир томонлама қароридир, дея таъкидлайди банк. Троллейбус деполарини реконструкция қилиш троллейбуслар фаолиятига халақит бермайдиган тарзда амалга оширилмоқда: янги, аввал фойдаланилмаган участкаларда электробуслар учун жойлар ташкил этилмоқда.
Лойиҳа доирасида иккита электробус етиб келган, қолган 118 тасини эса 2025 йилнинг ёзида етказиб бериш режалаштирилган. Электробуслар муваффақиятли амалга оширилганидан сўнг, ОТБ лойиҳанинг иккинчи босқичини Қирғизистон пойтахти мэрияси билан муҳокама қилмоқчи ва шаҳардаги ҳаво сифатини янада яхшилаш бўйича «Бишкек СМОГ» ташаббусини қўллаб-қувватлашни интиқлик билан кутади.
ℹ️ Эслатиб ўтамиз, 2024 йил июль ойида Бишкек маъмурияти раҳбари Айбек Жушуналиев троллейбуслардан бутунлай воз кечишини маълум қилган, унинг ўрнига электробуслар йўлга қўйилиши режалаштирилган бўлган. Бундан ташқари, линияларни демонтаж қилиш ташаббус муҳокама қилинишидан олдин бошланган. Троллейбусларнинг бир қисми Ўш ва Норинга берилган, бироқ Норинда эскирганлиги ва таъмирнинг қимматлиги сабабли улардан фойдаланишни тўхтатишга қарор қилишган – эҳтиёт қисмларни Россиядан буюртма қилишга тўғри келган.
Бишкек аҳолиси бир неча бор расмийларнинг бундай ҳаракатларига қарши чиқишган. Ноябрь ойи ўрталарида улар «Ҳоким истеъфога чиқсин, троллейбусларни қайтаринг!» шиори остида очиқ акция ўтказиш ниятида бўлишган. Ноябрь ойи охирида Бишкек маъмурий суди пойтахт мэриясига троллейбус алоқа тармоғини демонтаж қилишни тўхтатиб туришни буюрган, бироқ бир ҳафта ўтиб бу қарорни бекор қилган.
