culture.ru сайти фотосурати
Инвестицион низоларни ҳал қилиш бўйича халқаро марказ (ICSID арбитраж суди турк тўқимачилик компаниясининг Ўзбекистонга қарши 700 миллион доллар миқдоридаги даъволарини рад этди. Бу ҳақда Адлия вазирлиги матбуот хизмати хабар берди.
Қайд этилишича, ICSID ўз қарорини ўтган йил октябрь ойида қабул қилган, бироқ бу ҳақдаги маълумотлар энди эълон қилинган.
Жараён 2017 йил июль ойида Туркиянинг Bursel Tekstil Sanayi компанияси ташаббуси билан бошланган. Тадбиркорлар Ўзбекистон тўқимачилик саноатига киритган сармоялари экспроприация қилинганини даъво қилишган. Даъвонинг умумий миқдори тахминан 700 миллион долларни ташкил этган.
Арбитраж трибуналининг қарорига кўра, Burselнинг барча даъволари рад этилган, бундан ташқари, даъвогарлар Ўзбекистон томонининг арбитраж харажатларини қоплашлари шарт. Арбитраж қоидаларига кўра, суд қарори якуний ва мажбурийдир.
Bursel Tekstil Sanayi ve Dış Ticaret A.Ş. — 2000 йиллар бошида Ўзбекистон тўқимачилик саноатига сармоя киритган турк тўқимачилик компанияси. Жумладан, у Тошкентда ОПEК Халқаро тараққиёт жамғармаси ва Европа тикланиш ва тараққиёт банки (ЕТТБ) томонидан молиялаштирилган тўқимачилик фабрикасини қуриш лойиҳасида иштирок этган. 2011 йилга келиб унинг Ўзбекистонда учта заводи бўлган.
ℹ️ 2019 йили Ўзбекистон Иқтисодиёт ва саноат вазирлиги 15 та асосий муаммо хорижий инвестицияларни жалб этишга тўсқинлик қилаётганини, жумладан, давлатнинг иқтисодиётга катта таъсири, норматив-ҳуқуқий муҳитнинг номукаммаллиги, технологик ишлаб чиқариш даражасининг пастлиги ва бошқаларни эътироф этган. Бироқ, маҳаллий ҳокимият органларининг ўзбошимча қарорлари натижасида инвесторларнинг ўз бизнесини йўқотиш хавфи ҳақида гапирилмаган. Масалан, Ислом Каримов даврида бу муаммога Россиянинг МТС ва «Вимм-Билль-Данн» компаниялари, Американинг Newmont Mining ва Coca-Cola, Исроилнинг Metal-Tech Ltd, Британиянинг Oxus Gold PLC компаниялари, Тошкентдаги «Туркуаз» ва «Демир» савдо марказларига эгалик қилган турк ишбилармонлари дуч келган.
