Сурхондарё вилояти ҳокимлиги матбуот хизмати фотосурати
Шарофиддин Лолаев Сурхондарё вилояти маъмурий маркази Термиз шаҳрига янги ҳоким этиб тайинланди. У бунгача вилоят қурилиш ва уй-жой коммунал хўжалиги соҳасида ҳудудий назорат қилиш инспекцияси бошлиғи лавозимида ишлаб келган, дея аниқлик киритади вилоят ҳокимлиги матбуот хизмати.
Лолаев номзодини халқ депутатлари шаҳар Кенгашининг навбатдан ташқари сессиясида Сурхондарё вилояти ҳокими Улуғбек Косимов тақдим этди. Маҳаллий ҳокимият вакиллари Термиз шаҳар ҳокими лавозимига номзодни тасдиқлади. Сессияда вилоят раҳбари янги ҳокимга Термиз шаҳрини ижтимоий-иқтисодий ривожлантириш, инфратузилмани яхшилаш, аҳоли турмуш даражасини ошириш юзасидан вазифаларни юклади ҳамда янги лавозимдаги фаолиятида муваффақиятлар тилади.
Лолаев Термиз раҳбари сифатида бошқа ишга ўтгани сабабли лавозимидан озод этилган Ўктам Тўраев ўрнини эгаллади. Собиқ шаҳар ҳокими 2022 йил сентябрь ойидан бери мазкур лавозимини эгаллаб келганди.
Шарофиддин Лолаев 1987 йили Сурхондарё вилояти Қумқўрғон туманида туғилган. 2015 йили Термиз давлат университетининг бакалавриатини, 2021 йили эса ушбу университетнинг магистратура босқичини тамомлаган. У аввал қурилиш соҳасида, хусусан, вилоят назорат инспекциясида ишлаб, Денов тумани ва Термиз шаҳар ҳокими ўринбосарлари лавозимларида ишлаган.
