sputnik.kg сайти фотосурати
Бишкекдаги Жибек Жолу кўчасини Жанубий магистрал билан боғлайдиган осма йўл 2028 йилгача қурилади.Бу муддат шаҳарни яқин йилларга мўлжалланган ижтимоий-иқтисодий ривожлантириш дастури лойиҳасида кўрсатилган, деб ёзади 24.kg нашри мазкур ҳужжатга таяниб.
Пойтахт ҳокимиятининг аниқлик киритишича, осма йўлнинг узунлиги 6 километрга яқин бўлади. Объект кунига 50 мингдан 100 минггача йўловчига хизмат кўрсатиши тахмин қилинмоқда.
Бишкек мэрияси таъкидлашича, осма йўл шаҳарнинг зич ҳудудларида транспорт инфратузилмасини яхшилаш учун экологик тоза ва самарали ечим бўлади.
Қайд этилишича, мазкур лойиҳа объектни қуриш ва фойдаланиш босқичларида иш ўринларини яратиш ҳамда сайёҳларни жалб этиш орқали иқтисодий ўсишни рағбатлантиришга хизмат қилади.
Янги транспорт тури қулайлик ва шинамлик туфайли Бишкек аҳолисининг ҳаёт сифатини яхшилайди, дея хулоса қилади Қирғизистон пойтахти маъмурияти.
Режага кўра, лойиҳа жорий йили бошланиб, қурилиш уч йил давом этади. Мазкур иншоотни қуриш қиймати 70 миллион еврони ташкил қилади. Молиялаштириш инвестор томонидан амалга оширилади. Унинг ким экани ҳозирча номаълум.
ℹ️ Ўтган йил февраль ойида Бишкек мэрияси осма йўл лойиҳаси бўйича ишчи гуруҳ тузилгани ҳақида хабар берган эди. Объект Швейцария компанияси томонидан қурилади ва у бешта станцияни ўз ичига олади, деб тахмин қилинган эди. Шу билан бирга, қурилиш 50-60 миллион долларга тушиши, транспорт линияси 2025 йилнинг учинчи чорагида фойдаланишга топширилиши мумкинлиги кўрсатилганди.
Кейинчалик лойиҳанинг ҳомийси борлиги маълум бўлди, у осма йўл қурилишининг техник-иқтисодий асосларини тайёрлаш учун европалик мутахассисларга 300 минг доллар ажратган. Жорий йил бошида шаҳар ҳокимияти техник-иқтисодий асослаш тугаллангани ҳақида жамоатчиликни хабардор қилган эди.
