Марат Бекетаев. nur.kz сайти фотосурати
Қозоғистоннинг собиқ Адлия вазири Марат Бекетаев мол-мулки мусодара қилинган ҳолда 9 йилга озодликдан маҳрум этилди. Бу ҳақда Коррупцияга қарши курашиш агентлиги расмий вакили Дониёр Бигайдаров маълум қилди, деб ёзади Kursiv.kz.
«Собиқ Адлия вазири Бекетаевнинг жиноий иши фирибгарлик, ўта йирик ҳажмдаги ўғирлик, тадбиркорлик фаолиятида ноқонуний иштирок этиш ҳолатлари бўйича тергов қилинди», — дейди Бигайдаров. У тергов тафсилотларини келтирмаган, чунки иш махфий бўлган.
Коррупцияга қарши курашиш агентлиги ходимлари 2023 йил октябрь ойида Марат Бекетаевни қўлга олишган. Собиқ амалдор (2016-2022 йиллари Адлия вазирлиги раҳбари лавозимида ишлаган) хорижга олиб кетилган мол-мулкни топиш ва қайтариш бўйича олиб борилаётган ишлар доирасида ҳибсга олинган.
«У хизматлар кўрсатиш талаб этилмайдиган йиллик шартномалар тузиш орқали аффилланган компаниялар манфаатларини қўллаб-қувватлаган ва бу орқали давлатга ўта йирик миқдорда зарар етказган», — дейилади агентлик хабарида.
Бир неча кундан сўнг Бош прокурор ўринбосари Асет Чиндалиев журналистларга Бекетаев Қозоғистондан қочишга уринган вақтда қўлга олинганини хабар қилди.
Қозоғистон ОАВлари Адлия вазирлигининг собиқ раҳбари активларини четга олиб чиқишда гумон қилинаётган Bolashak Consulting Group компанияси ишида аввалига гувоҳ, кейин эса гумонланувчи бўлганини ёзади. Айни компания аввалроқ Қозоғистон манфаатларини хорижда ҳимоя қилган, хусусан, молдовалик тадбиркорлар Габриэл ва Анатол Статига қарши шов-шувли ишда.
