iz.ru сайти фотосурати
Ўзбекистоннинг икки вилоятида Россия армияси сафларида махсус ҳарбий операцияда қатнашган республика фуқаролари устидан суд жараёнлари бўлиб ўтди. Иккала ҳолатда ҳам жиноят иши бўйича судланувчилар «ёлланиш» моддаси бўйича айбдор деб топилди ва озодликдан маҳрум этилди, деб ёзади UzNews.uz.
Бухоро вилояти Ромитан туман суди томонидан 32 ёшли А.Р. иши кўриб чиқилди. Тергов материалларига кўра, у 2018 йили пул ишлаш мақсадида Россияга борган. Кейинчалик бу одам Ўзбекистон фуқаролигидан воз кечмасдан Россия фуқаролигини олган. Ўтган йил май ойида полиция мигрантни қўлга олиб, тергов изоляторига жойлаштирган. Суддан қутулиш мақсадида фуқаро Мудофаа вазирлиги билан шартнома имзолаган ва МҲОда иштирок этган.
А.Р. Луганскдаги жанговар ҳаракатларда фаол қатнашган. 2024 йил июль ойида ҳарбий базага берилган ракета зарбаси натижасида у танасининг турли қисмларидан яраланиб, касалхонага ётқизилган. Даволанишдан сўнг ўзбекистонлик хизматга яроқсиз деб топилган. Эркакка 3 миллион рубль (38 минг доллар) тўланган ва у уйига кетишга қарор қилган.
Бу ерда унга нисбатан жиноий иш очилган. Унинг телефонини кўздан кечириш чоғида хавфсизлик кучлари айбланувчининг бошқа давлат томонидаги жанговар ҳаракатларда иштирок этганини тасдиқловчи ҳужжатлар, фотосуратлар ва видеоларни топган. Натижада А.Р. Ўзбекистон Жиноят кодексининг 154-моддаси («Ёлланиш») билан айбдор деб топилиб, беш йил муддатга озодликдан маҳрум этилган.
Шунга ўхшаш яна бир суд жараёни Андижон вилоятининг Олтинкўл туманида бўлиб ўтди. Айбланувчи курсисида 41 ёшли Ш.К. бўлган. Иш материалларига кўра, ўзбекистонлик 2023 йили Назран шаҳрига ишлаш учун жўнаб кетган. У ерда Россия армияси сафига қўшилган ва 2024 йил апрелдан декабргача МҲОда қатнашган.
Таъкидланишича, мигрант снаряд портлаши натижасида бир қанча жароҳатлар олган. Жароҳатлари туфайли унга таътилга рухсат берилган, бу вақт давомида чет эл фуқароси полиция томонидан ушланган. Чунки Ш.К.нинг шахсни тасдиқловчи ҳужжатлари бўлмаган, ватанига депортация қилинган.
Уйига қайтган фуқаро жанговар ҳаракатларда иштирок этганини тан олиб, ўзи ҳуқуқ-тартибот идораларига таслим бўлган. Суд жараёнида ўзбекистонлик тавба қилган, енгилроқ жазо тайинлашларини сўраган. У республика Жиноят кодексининг «ёлланиш» моддаси билан айбдор деб топилиб, уч йилу бир ой муддатга озодликдан маҳрум этилган.
