Мухлислар. "Тренчин" ФК матбуот хизмати фотосурати
Қирғизистон футбол иттифоқи президенти, Миллий хавфсизлик давлат қўмитаси раҳбари Қамчибек Ташиев Словакиянинг «Тренчин» футбол клубининг акциядори бўлиш орқали уни банкротликдан қутқариб қолди. Бу ҳақда sport24.pluska.sk хабар берди.
Нашрнинг ёзишича, ўтган йили «Тренчин» молиявий муаммоларга дуч келган, бироқ Қирғизистондан инвестор пайдо бўлиши билан вазият ўзгарган.
«Ушбу қўллаб-қувватлаш туфайли клуб уч ой давомида йиғилиб қолган қарзларини тўлади. «Тренчин»нинг янги инвестори Қамчибек Ташиев нафақат Қирғизистон футбол иттифоқи раҳбари, балки мамлакат махфий хизмати раҳбари ҳамдир», — дейилади мақолада.
Бу маълумотни клуб директори Роберт Рибничек ҳам тасдиқлади. X Futbalove Zakulisie ижтимоий тармоғидаги Словакия спорт канали Ташиев «Тренчин» акцияларининг 10 фоизига эга эканини аниқлаган. Қамчибек Ташиевнинг ўғли Эмирхон Қидиршаевнинг шу йил бошида клубда пайдо бўлганини блогер шундан деб билади. Машҳур словакиялик мураббий Владимир Коникнинг таъкидлашича, футболчини «таниш-билишчилик орқали» қўлга киритиш бир қарашда яхши кўринмайди, лекин бу ҳолатни қоралашга сабаб бўлолмайди.
«Бу ҳақда Қирғизистон миллий терма жамоасининг собиқ бош мураббийи Стефан Таркович билан гаплашдим. У бу одам зўравонлик қилади, деб ўйламайди. У футболни тушунади, маслаҳатларга қулоқ солади. Бироқ, шубҳасиз, унинг 19 ёшли ўғли жамоага қўшилгани баҳс-мунозараларга сабаб бўлади. Бошқа томондан, у ҳали ўсмир, балки ўзини кўрсата олар», — дея тахмин қилади Коник.
Эслатиб ўтамиз, Эмирхон Қидиршаев мавсум якунида «Тренчин»ни тарк этганди. Айни пайтда у Жалолободнинг «Мурас Юнайтед» клуби билан шартнома имзолаган.
Шу билан бирга, яна бир қирғизистонлик футболчи, 18 ёшли Арсен Алибаев «Тренчин» ёшлар жамоаси аризасига киритилган. Эслатиб ўтамиз, «Мурас Юнайтед» клуби асосчиси Қирғизистон футбол федерациясининг собиқ президенти Айбек Алибаев ҳисобланади. У Жалолободда «Барселона» академиясини барпо этишда иштирок этган, ушбу академия ҳаммуассисларидан бири Тай-Мурас Ташиевдир.
