Каспий қувурлари консорциуми (КҚК) матбуот хизмати фотосурати
Россия президентининг янги фармонидан сўнг Қозоғистон нефтини Россия денгиз портлари орқали жўнатиш тўхтатилмаган. Бу ҳақда «Интерфакс»га республика Энергетика вазирлиги матбуот хизмати хабар берди.
«Уст-Луга портидаги вазиятга келсак, транспорт инфратузилмаси объекти хавфсизлигини ошириш бўйича қўшимча чора-тадбирлар кўрилиши муносабати билан «КазТрансойл» ОАЖ «Невская трубопроводная компания» МЧЖ (бу Уст-Луга денгиз савдо портидаги нефтни қайта юклаш терминалининг эгаси ва оператори, —таҳр.изоҳи) билан музокаралар олиб бормоқда»,— дейилади вазирлик хабарида.
Аввалроқ Reuters агентлиги ўз манбаларига таяниб, Новороссийск ва Южная Озереевкада нефть ташувчи танкерларни юклаш Россия портларига кемалар киришини мувофиқлаштиришнинг янги маъмурий тартиби туфайли тўхтатилгани ҳақида хабар берган эди. Россия президенти Владимир Путин 21 июль куни қоидаларни кучайтириш тўғрисидаги фармонни имзолаган. Унга кўра, порт маъмуриятининг хорижий кемаларнинг киришига рухсати Федерал хавфсизлик хизмати (ФХХ) билан келишилган ҳолда бўлиши керак.
Агентлик таъкидлашича, ушбу чеклов Каспий қувури орқали Қора денгизга ташилаётган Қозоғистон нефтининг Ғарб бозорларига кейинги етказиб берилишига тўсқинлик қилади. Шу билан бирга, агентлик манбаларидан бири вазият бир неча кун ичида нормаллашишини тахмин қилган.
Қора денгиздаги Новороссийск порти Urals, KEBCO ва Siberian Light хом нефти экспорти ва транзитини амалга оширади. Каспий қувурлари консорциумига (КҚК) тегишли бўлган Южная Озереевкадаги қўшни терминал CPC Blend билан ишлайди.
КҚК нефть жўнатиш тизими Каспий минтақасидан нефтни жаҳон бозорларига ташишнинг энг йирик йўналиши ҳисобланади. Бу тизим Қозоғистон нефтининг асосий экспорт йўналиши бўлиб, Қозоғистондан нефть қувури орқали жўнатиладиган нефть ҳажмининг 80% дан ортиғини ташкил этади.
