m24.ru сайти фотосурати
Россия президенти Владимир Путин олинган Россия фуқаролигидан маҳрум этиш асослари рўйхатини сезиларли даражада кенгайтирувчи қонунни имзолади.
«Россия Федерацияси фуқаролиги тўғрисида» ги қонуннинг 24-моддасида эмигрантларни Россия паспортидан маҳрум қилишнинг 20 дан ортиқ янги сабаби келтирилган. Путин томонидан тасдиқланган рўйхатга РФ Жиноят кодексида назарда тутилган турли жиноят турлари киритилган. Жумладан:
▪️ қотиллик;
▪️ 12 ёшдан 14 ёшгача бўлган шахсга нисбатан, шунингдек икки ёки ундан ортиқ шахсга нисбатан содир этилган бузуқчилик ҳаракатлари;
▪️ уюшган гуруҳ томонидан вояга етмаган шахсни фоҳишаликка мажбурлаш;
▪️ зўравонлик қўллаган ёки қўллаш таҳдиди билан вояга етмаганлар иштирокида фоҳишаликни ташкил этиш;
▪️ бир гуруҳ шахслар томонидан, олдиндан келишиб ёки уюшган гуруҳ томонидан бировни зўрлаш;
▪️ террорчилик фаолиятига оммавий чақириқлар, терроризмни оқлаш ёки уни ташвиқот қилиш;
▪️ Россиянинг муҳим ахборот инфратузилмасига ноқонуний таъсир кўрсатиш;
▪️ хорижий давлат ёки халқаро ташкилот билан махфий ҳамкорлик;
▪️ Россия хавфсизлигига қарши қаратилган ҳаракатларда душманга ёрдам бериш;
▪️ давлат хавфсизлигига қарши курашишга оммавий чақириқлар;
▪️ нацистларнинг атрибутлари ёки белгиларини, шунингдек экстремистик ташкилотларнинг атрибутларини такрорий ташвиқот ва омма олдида намойиш қилиш;
▪️ Россия иштирок этмаётган халқаро ташкилотлар ёки хорижий давлат органлари қарорларини амалга оширишда ёрдам бериш;
▪️ ноқонуний миграцияни ташкил этиш;
▪️ экстремистик сабабларга кўра ёки терроризм ёки саботажни оқлаш мақсадида содир этилган бошқа ҳар қандай жиноят.
Давлат Думаси раиси Вячеслав Володин таъкидлашича, олинган фуқароликни бекор қилиш учун асослар сони ҳозир 80 дан ошади, «бу жуда катта восита ва ҳуқуқни муҳофаза қилиш органлари ходимлари учун тартибни тиклаш учун имкониятдир». Давлат Думаси «қонун Донецк ва Луганск халқ республикалари, Херсон ва Запорожье вилоятлари, Қрим Республикаси ва Севастополда яшовчи РФ фуқароларига таъсир қилмаслигини» таъкидлади.
