Сергей Фадеичев фотосурати / ТАСС
Москва яқинидаги «Крокус-сити холл»да содир этилган терактда айбланган тўрт нафар тожикистонлик айбларига тўлиқ иқрор бўлган ва қилмишидан пушаймон бўлган. Бундан ташқари, Шамсиддин Фаридуни, Далержон Мирзоев, Муҳаммадсобир Файзов ва Саидакрам Рачабализода жабрланувчилардан узр сўраган, деб хабар беради ТАСС адвокат Людмила Айварга таяниб.
Адвокатнинг сўзларига кўра, 4 август куни Москва шаҳар суди биносида бошланган суд жараёнида айбланувчилар ўз айбларига иқрор бўлишган. 127 жабрдийданинг манфаатларини ҳимоя қилаётган Айварнинг айтишича, террор ҳужумининг бевосита ижрочилари айблов ҳулосаси эълон қилинганидан сўнг тавба қилишган.
Айбланувчилардан бири Файзовнинг айтишича, айрим шахслар унинг ёшлигидан фойдаланиб қолишган ва уни алдашган, аслида унинг бошқа ҳаётий режалари бўлган.
«Крокус»га қилинган ҳужум иши 2-Ғарбий округ ҳарбий суди томонидан кўриб чиқилмоқда. Прокуратура талаби билан суд жараёни ёпиқ эшиклар ортида ўтмоқда. ОАВ маълумотларига кўра, судя прокурорлар талабига пешвоз чиққан, чунки суд жараёни иштирокчилари учун ҳақиқий таҳдид мавжуд бўлган, бу эса ишни очиқ кўриб чиқишни имконсиз қилади.
Шу билан бирга, Людмила Айвар суд мажлисларини фақат далилларни ўрганиш нуқтаи назаридан ёпиқ тарзда ўтказишни, акс ҳолда очиқлик тамойилига риоя қилишни сўраган, чунки иш кенг жамоатчилик эътиборида.
РБК хабарига кўра, суд мажлислари ҳафтасига уч марта 150 кишини сиғдира оладиган ва Европадаги энг йирик судлардан бири ҳисобланган Москва шаҳар суди апелляция биносининг 635-чи залида бўлиб ўтмоқда. Келажакда суд мажлисларида фақат суд жараёнининг бевосита иштирокчилари қатнашиши мумкин; матбуот ва ташқи кузатувчилар учун кириш имконияти чекланган.
Июнь ойи охирида фақат биргина судланувчи Шамсидин Фаридуни ўз айбига тўлиқ иқрор бўлгани ва қилмишидан пушаймонлиги ҳақида хабар берилган эди. Яна уч нафар судланувчи ўз айбларига иқрор бўлган, бироқ пушаймонлик билдирмаган.
ℹ️ 2024 йил 22 март куни Москва вилоятининг Красногорск шаҳридаги «Крокус Сити Холл» концерт залида теракт «Пикник» рок гуруҳи чиқиши олдидан содир бўлганди. Камуфляждаги бир нечта қуролланган киши мажмуага кириб, одамларга қарата ўқ ота бошлаган. Улар концерт залига кириб, ўт қўйишган. Ёнғин бинонинг тўрт қавати ва томини қамраб олган, шундан сўнг улар ўзлари келган машинада қочиб кетишган.
Теракт оқибатида 149 киши ҳалок бўлган, бир киши бедарак йўқолган, 609 киши жароҳатланган. Ҳужумдан етказилган зарар 6 миллиард рублга баҳоланмоқда.
27 киши жиноий жавобгарликка тортилди. Жумладан, тўрт нафар ҳужумчи, уларга машина сотган, террорчиларга квартира ижарага берган ёки уларга пул ўтказмаларини юборган одамлар. Ишда 1700 дан ортиқ жабрланувчи ва 800 гувоҳ иштирок этмоқда. Россия Тергов қўмитаси теракт Украинанинг амалдаги ҳукумати манфаатларини кўзлаб амалга оширилганини, ҳужумдан мақсад эса Россиядаги сиёсий вазиятни беқарорлаштириш эканини таъкидлади.
