Денис Мороз. «Ўзатом» матбуот хизмати фотосурати
Агар Тошкент қизиқиш билдирса, Беларусь Ўзбекистонда биринчи атом электр станцияси (АЭС) қурилишида иштирок этишга тайёр. Бу ҳақда Беларусь Энергетика вазири Денис Мороз 5 август куни Минскда «Ўзатом» ядро энергетикаси агентлиги директори Азим Ахмедхаджаев бошчилигидаги делегация билан учрашувда маълум қилди, деб хабар беради Беларусь Энергетика вазирлиги матбуот хизмати
Мулоқот чоғида атом энергетикасини ривожлантириш бўйича ҳамкорлик истиқболлари, жумладан, инфратузилмани яратиш, кадрлар тайёрлаш, радиоактив чиқиндиларни бошқариш ва АЭСни Ўзбекистон энергетика тизимига интеграциялаш масалалари муҳокама қилинди. Мороз Ўзбекистоннинг атом энергиясидан тинч мақсадларда фойдаланиш қарорини қўллаб-қувватлади ва Беларусь ўз тажрибаси билан ўртоқлашишга тайёрлигини таъкидлади.
Ўзбекистон президенти Шавкат Мирзиёев топшириғига кўра «Ўзатом» вакиллари Беларусга келди, деб хабар қилади агентлик матбуот хизмати. Уларга АЭС қуриш ва улардан фойдаланиш бўйича Беларусь тажрибасини ҳар томонлама ўрганиш ва ундан Ўзбекистонда биринчи ана шундай электр станциясини қуришда фойдаланиш имкониятларини ўрганиш вазифаси қўйилган.
Морознинг сўзларига кўра, АЭСнинг ишга туширилиши Беларуснинг энергетик хавфсизлигини таъминлайди ва турдош тармоқларни, жумладан, турар-жой биноларини электрлаштириш, электр транспортини ривожлантириш ва иқтисодиётда инновацион лойиҳаларни амалга оширишни ривожлантиришга хизмат қилади. Вазир станция юқори халқаро хавфсизлик стандартлари асосида қурилганини алоҳида таъкидлаб, станция хавфсизлиги масаласини устувор вазифа деб атади.
«Мамлакатимиз 2023 йили қуввати 2400 мегаватт бўлган биринчи Беларусь атом электр станциясини ишга туширди. Мамлакатда истеъмол қилинадиган барча электр энергиясининг қарийб 40 фоизи ушбу АЭСда ишлаб чиқарилади. Беларусь АЭС қурилишида муваффақиятли ўзини кўрсатган компаниялар «Росатом» давлат корпорациясининг хориждаги қўшма лойиҳаларида фаол иштирок этмоқда. Ишончим комилки, беларуслар Ўзбекистонда АЭС қурилишда иштирок этишлари мумкин», — дея Мороз сўзларидан иқтибос келтиради «Ўзатом» матбуот хизмати.
Ўз навбатида, Азим Ахмедхаджаев Беларуснинг атом электр станциясини жорий этиш ва интеграциялашуви бўйича тажрибаси бу соҳадаги энг илғор ва муваффақиятли тажрибалардан бири эканлигини таъкидлаган.
«Бизда манффатлар тўқнашувини топиш, ҳамкорликни ривожлантириш ва беларуслик ҳамкасбларимизни лойиҳамизда иштирок этишга таклиф қилиш учун яхши истиқболлар бор», — деган Ахмедхаджаев.
ℹ️ Россиянинг «Росатом» корпорацияси Ўзбекистонда АЭС қуриш лойиҳасини ўз зиммасига олган. 2024 йил 27 май куни Россия Президенти Владимир Путиннинг давлат ташрифи чоғида Тошкентда ҳар бири 55 МВт қувватга эга олтита реактордан иборат кам қувватли атом электр станциясини (КҚАЭС) лойиҳалаш, етказиб бериш ва қуриш бўйича шартнома имзоланган эди. КҚАЭС Жиззах вилоятининг Фориш туманидаги Тузкон кўли яқинида қурилиши режалаштирилган. Бош пудратчи «Атомстройэкспорт» ОАЖ («Росатом «инжиниринг бўлими) бўлиб, ишга маҳаллий компаниялар жалб этилади. Жорий йилнинг март ойида КҚАЭС қурилишида биринчи бетонни қуйиш 2026 йилнинг иккинчи чорагига мўлжалланганлиги хабар қилинган эди.
