Святослав Каверин. @swatslav фотосурати
Бир ойдан кўпроқ вақт олдин Афғонистонда ҳибсга олинган россиялик этнограф Святослав Кавериннинг онаси Татаристон раҳбари Рустам Миннихановга ўғлининг озод этилишига ёрдам беришини сўраб мурожаат йўллади. Бу ҳақда BAZA Telegram-канали хабар беради.
Каверинанинг таъкидлашича, Татаристон раҳбарига мурожаат қилишига ушбу республика Афғонистоннинг янги ҳукумати – «Толибон»* ҳаракати билан алоқа ўрнатган Россия Федерациясининг биринчи субъекти бўлганлиги сабаб бўлган.
«Татаристон Республикаси Россия ва Афғонистон ўртасидаги муносабатлар кўпригидир. Афғонистон ҳукумати аъзолари республикангизга бир неча бор ташриф буюрган. Сиз Афғонистондаги Россия бизнес маркази орқали улар билан яқин, ишончли муносабатлар ўрнатдингиз», — дейилади Каверина мактубида.
Аввалроқ, этнограф онаси Афғонистоннинг Россиядаги элчихонаси ва Россия ТИВ билан боғланган, бироқ «ҳалигача Святослав Кавериннинг қаердалиги ва аҳволи ҳақида расмий маълумот бўлмаган».
ℹ️ Святослав Каверин — рус этнологи ва Ҳиндукуш халқлари маданияти тадқиқотчиси, Шарқий Афғонистон ва Шимолий Покистон минтақалари бўйича мутахассис. Россия давлат гуманитар университетини тамомлаган, Москвадаги Палеотнологик тадқиқотлар марказида, шунингдек, Еревандаги Россия-Арманистон университети Шарқшунослик институтида ишлаган. Каверин тадқиқотлари Ҳиндукушнинг бориш қийин бўлган ҳудудларига дала экспедицияларини ўз ичига олади, у ерда у кичик халқларнинг ўзига хос анъаналари, тили, либослари ва этник ўзига хослигини ўрганган.
Каверин 19 июль куни Қундуз вилоятида эсдалик сифатида олиб юрган заргарлик буюмларини ноқонуний олиб ўтишда гумонланиб қўлга олинган эди. Афғонистондаги Россия бизнес маркази маълумотларига кўра, ҳибсга «ҳамроҳлик қилаётган шахслар малакаси масаласи» сабаб бўлган: эҳтимол, маҳаллий ҳукумат Каверинга ҳамроҳлик қилаётганларни шубҳали деб ҳисоблаган. Шу билан бирга, толиблар* этнограф ҳибсга олинганини расман тан олмаган ва россиялик дипломатларга унинг қаердалиги ҳақида ҳеч қандай маълумотга эга эмаслигини айтишган. BAZA хабарига кўра, Каверин Кобулдаги хорижликларни сақлаш марказида сақланмоқда.
