uznews.uz сайти фотосурати
Йил бошидан буён Ўзбекистонга 700 мингдан ортиқ меҳнат мигранти қайтди. Бу ҳақда мамлакат президенти Шавкат Мирзиёев Тошкентдаги «Янги Ўзбекистон» боғида Мустақиллик байрамига бағишланган тантанали маросимда сўзлаган нутқида маълум қилди.
«Энг муҳими, ислоҳотларимизга ишониб, шу йилнинг ўзида четда ишлаётган 700 минг фуқаромиз юртимизга, ўз оиласи бағрига қайтди», — деди давлат раҳбари.
Қайтаётган меҳнат мигрантлари сонининг кўпайиши кенг кўламли иқтисодий ислоҳотларнинг амалга оширилиши, иш ўринлари сони кўпайиши ва ишбилармонлик муҳитининг яхшиланиши билан бевосита боғлиқ, дейилади Президент нутқида. Унинг бутун нутқи Ўзбекистоннинг ўтган 8 йил давомида – Мирзиёев ҳокимиятга келганидан сўнг эришган муваффақиятларига бағишланди. Бу давр мамлакатда «Янги Ўзбекистон» деб аталади.
Президент таъкидлашича, «Янги Ўзбекистонда тадбиркорлик иқтисодиётнинг ҳаракатлантирувчи, қудратли кучига айланди». Кичик ва ўрта бизнес субъектлари сони икки баробарга кўпайиб, бугунги кунда ушбу соҳада 10 миллиондан ортиқ киши банд. 2025 йил январь ойидан буён ушбу ва бошқа соҳаларда 5 миллион киши иш топди.
Охирги саккиз йил ичида мамлакат ялпи ички маҳсулоти (ЯИМ) икки баробарга ошиб, 115 миллиард долларни ташкил этди. Йил охиригача ялпи ички маҳсулот 130 миллиард долларга етиши, экспорт ҳажми эса 26 миллиард доллардан ошиши кутилмоқда.
Бу даврда хорижий инвестисиялар ҳажми қарийб 130 миллиард долларни ташкил этди, олтин-валюта захиралари эса илк бор 48 миллиард доллардан ошди.
Энергетика соҳасида «яшил» ишлаб чиқаришни ривожлантириш давом этди: электр энергияси ишлаб чиқариш ҳажми 59 дан 85 миллиард кВт/соатгача ошди, қайта тикланадиган энергия улуши 30 фоизга етди. 2030 йилга бориб бу кўрсаткични 54 фоизга етказиш режалаштирилган.
Ўзбекистонда 31 миллион квадрат метрдан ортиқ уй-жой ёки 12 мингга яқин кўп қаватли уй-жой барпо этилди, бу «ҳақиқатан ҳам тарихий натижага айланди».
Президент мамлакатда камбағаллик даражаси 35 фоиздан 6,8 фоизга камайтирилгани, ижтимоий дастурлар доирасида 2,5 миллион эҳтиёжманд оила қамраб олинганини таъкидлади. 2025 йилда ушбу мақсадлар учун 19 триллион сўм (1,5 миллиард доллар) йўналтирилди. Соғлиқни сақлашга ҳаражатлар олти баравар кўпайган, маҳаллаларда сифатли тиббий хизмат кўрсатиш йўлга қўйилди. Ҳудудларда 400 дан ортиқ турдаги юқори технологияли жарроҳлик амалиётлари амалга оширилмоқда. Ўртача умр кўриш 73,8 ёшдан 75,1 ёшга кўтарилди.
Болаларнинг мактабгача таълим муассасаларига қамрови 78 фоизга, боғчалардаги ўринлар сони 2,5 миллионга етди. Қўшимча 1 миллион талаба ўрни яратилди. Олий маълумотли ёшлар улуши саккиз йил ичида 9 фоиздан 42 фоизга ошган, талабаларнинг 53 фоизини қизлар ташкил этади. Ҳозирги вақтда дунёдаги топ олийгоҳларда 2 мингдан зиёд талабаларимиз таҳсил олмоқда. Улардан 750 нафари “Эл-юрт умиди” жамғармаси орқали давлат ҳисобидан ўқимоқда.
2025 йили Ўзбекистон ёшлари халқаро фан олимпиадаларида 2 олтин, 8 кумуш ва 5 бронза медалини қўлга киритди. МДҲ давлатлари ичида ўзбекистонликлар кимё бўйича иккинчи, математика ва иқтисод бўйича учинчи, ахборот технологиялари ва география бўйича тўртинчи ўринни эгаллади.
Давлат бошқаруви соҳасида суд-ҳуқуқ тизими рақамлаштирилиб, сунъий интеллект жорий этилмоқда, бу эса, Мирзиёевнинг сўзларига кўра, суд жараёнларида «ошкоралик ва шаффофликни таъминлайди».
Мамлакат халқаро сиёсатда Марказий Осиё, МДҲ, Европа, Хитой, АҚШ давлатлари билан шериклик алоқаларини мустаҳкамлаб, минтақанинг сиёсий марказларидан бири мақомида мустаҳкамланиб бормоқда.
2024 йили хорижий сайёҳлар сони 10 миллиондан ошди, туризм хизматлари экспорти эса 3 миллиард доллардан ортиқни ташкил этди.
«Бугун Ўзбекистон бутун дунёга очиқ», – деди Мирзиёев.
