mir24.tv сайти фотосурати
Ўзбекистон президенти Шавкат Мирзиёев ҳар йили Шанхай ҳамкорлик ташкилотига (ШҲТ) аъзо давлатлар, шунингдек, уларнинг ҳамкорлари иштирокида «ШҲТ Инвест» форумини ўтказишни таклиф қилди. Бундан ташқари, Ўзбекистон келгуси йили биринчи шундай тадбирни ўтказишга тайёр, дея унинг сўзларидан иқтибос келтиради республика матбуот хизмати раҳбари.
Мирзиёевнинг таъкидлашича, самарали ишбилармонлар мулоқоти платформасининг ишга туширилиши савдо тўсиқларини бартараф этиш ва стандартларни уйғунлаштириш бўйича саъй-ҳаракатларни бирлаштириш, саноат кооперацияси ва инновацияларни рағбатлантиришни ривожлантириш нуқтаи назаридан муҳим аҳамиятга эга.
Транспорт йўлакларини ривожлантиришга ҳам эътибор қаратиш лозим. Бу борада Хитой – Қирғизистон – Ўзбекистон темир йўли қурилиши лойиҳаси катта аҳамиятга эга. Келгусида бу йўналишни Трансафғон йўлаги билан боғлаш ШҲТ маконида ягона логистика тармоғини шакллантиришга хизмат қилади, деди президент.
Унинг қайд этишича, ташкилот аъзолари сунъий интеллект, робототехника, биоинженерия, муқобил энергия каби йўналишларни ривожлантиришга туртки берадиган улкан илмий-техник салоҳиятга эга. Амалий қадам сифатида Ўзбекистон раҳбари янги ғояларни ишлаб чиқиш ва технологияларни узатиш учун ШҲТ инновацион ва технология марказлари тармоғини ташкил этишни таклиф қилди.
Гуманитар-маданий соҳадаги ҳамкорлик масаласида Буюк ипак йўлининг маданий мулоқотини йўлга қўйиш ташаббуси билдирилди. Фурсатдан фойдаланиб, Мирзиёев ҳамкорларни жорий йилнинг кузида минтақа мамлакатларининг ноёб тарихий меросини намойиш этиш учун муҳим майдон бўлиши кутилаётган Самарқандда бўлиб ўтадиган ЮНEСКО Бош конференцияси таклиф қилди.
Ўзбекистон раҳбари асосий эътиборни хавфсизлик масалаларига қаратди. Шу маънода, ШҲТ Минтақавий аксилтеррор тузилмаси базасида Хавфсизликка таҳдид ва хавф-хатарларга қарши курашиш бўйича универсал марказ, шунингдек, Душанбеда Наркотикларга қарши курашиш маркази ташкил этилганини олқишлади. Шу билан бирга, президент келаси йили Ўзбекистон пойтахтида биринчи «Хавфсизлик масалалари бўйича ШҲТ плюс мулоқоти»ни ўтказишни таклиф қилди.
Мирзиёев ўз нутқида бу галги саммит Иккинчи жаҳон уруши тугаганининг 80 йиллиги нишонланадиган йилда ўтказилаётгани рамзий маънога эга эканини алоҳида таъкидлади.
«Бу нафақат муҳим тарихий воқеа, балки ўзига хос огоҳлантириш ҳамдир. Тинчлик бир марта ва доимий эришиладиган неъмат эмас, уни доимо асраб-авайлаш ва мустаҳкамлаш зарур», — деди Ўзбекистон президенти.
Унинг қўшимча қилишича, Ғазо секторидаги вазият хавотир уйғотади ва Фаластин-Исроил можаросининг «икки халқ учун икки давлат» тамойили асосида адолатли ҳал этилишига умид билдиради.
Республика раҳбари очиқлик ва кўп қирралилик руҳига тўлиқ жавоб берадиган «ШҲТ Плюс» формати тобора оммалашиб бораётган ишончли мулоқот майдонига айланиб бораётганини таъкидлади.
«Олдиндан башорат қилиб бўлмайдиган халқаро вазият ҳукм сураётган шароитда ШҲТ жаҳонда барқарор ва адолатли тартиботни таъминлашнинг мустаҳкам таянчларидан биридир», — дея хулоса қилди Мирзиёев.
ℹ️ Шанхай Ҳамкорлик Ташкилоти Осиё минтақасидаги давлатларнинг халқаро бирлашмаси бўлиб, иқтисодий шериклик ва хавфсизлик, экстремизм ва терроризмга қарши курашиш масалаларини кўриб чиқади.
ШҲТ таркибига Ҳиндистон, Эрон, Қозоғистон, Хитой, Қирғизистон, Покистон, Россия, Тожикистон, Ўзбекистон ва Беларусь киради. Шунингдек, ШҲТнинг кузатувчи давлатлари ва ҳамкор давлатлари қаторидан Озарбайжон, Арманистон, Баҳрайн, Миср, Камбоджа, БАА, Саудия Арабистони, Туркия ва бошқалар ўрин олган.
