aif.ru сайти фотосурати
Навоий шаҳрида яшовчи аёл одамларни Украина ҳудудида махсус ҳарбий операцияда қатнашиш учун Россия армиясига ёллашга урингани учун уч йилга озодликдан маҳрум этилди. Бундан ташқари, Навоий вилоят суди апелляция ҳайъати биринчи инстанция ҳукмини ўзгаришсиз қолдирди, деб ёзади Kun.uz.
Иш материалларида Навоий шаҳрида яшовчи 1981 йилда туғилган Н.У. муқаддам фирибгарлик жинояти бўйича судланганлиги қайд этилган. 2024 йили у ватандошларини РФ Қуролли Кучлари сафига жалб қилиш орқали пул ишлашни таклиф қилган одам билан учрашади. Ўзбекистонлик аёл Самара шаҳрига келган, у ерда жиноятчилар ўзларининг кейинги ҳаракатларини режалаштиришган. Қайд этилишича, айбланувчи шеригига нисбатан ҳам жиноят иши қўзғатилган, бироқ у алоҳида процессга ажратилган.
Шу йил январь ойида аёл ватанига қайтиб келади. Бу ерда у Ўзбекистон фуқаросига МҲОда қатнашишни таклиф қилиб, ойига 4000 доллардан 7000 долларгача пул тўланишини ваъда қилади. Н.У. ёлланма аскар йилига 40 000 долларгача пул топиши мумкинлигини даъво қилган.
Кейин аёл «мижоз»ининг паспорт маълумотларини Россиядаги шеригига юборади. Шундан сўнг у эркакни чегарадан олиб ўтмоқчи бўлади. Аммо Тошкент вилоятидаги «Навоий» божхона постида аёл Ўзбекистон Давлат хавфсизлик хизмати ходимлари томонидан қўлга олинади.
Суд жараёнида аёл ўз айбига тўлиқ иқрор бўлиб, тавба қилган ва енгиллик сўраган.
Кармана туман суди Н.У.ни республика Жиноят кодексининг 25-моддаси («Жиноятга тайёргарлик кўриш ва жиноятга суиқасд») ва ёлланма шахсни ёллаш, ўқитиш, молиялаштиришни назарда тутувчи 154-моддаси 2-қисми («Ёлланиш») билан биргаликда айбдор деб топди.
Бундай қилмишлар учун 7 йилдан 12 йилгача озодликдан маҳрум қилиш жазоси назарда тутилганига қарамай, суд аёлга нисбатан енгилроқ 3 йил муддатга озодликдан маҳрум қилиш жазосини тайинлади.
