Алишер Навоий номидаги Давлат академик катта театри. uza.uz сайти фотосурати
Алишер Навоий номидаги Давлат академик катта театри (ДАКТ) томошабинлардан кийиниш қоидаларига амал қилишни сўрайди ва чипталар нархини оширади. Бу ҳақда театр директори Алибек Кабдурахмонов 96-театр мавсуми очилишига бағишланган матбуот анжуманида маълум қилди, деб ёзади «Газета.uz».
Кабдурахмоновнинг сўзларига кўра, театр қатъий давомат қоидаларига қайтади. Хусусан, томошабинлардан жинси шимлар, футболкалар, шортилар, спорт кийимлари ёки пойабзали киймаслиги сўралади. Томошабинлар залига устки кийимда, бош кийимда ва катта сумкалар билан кириш ҳам чекланади.
Кабдурахмонов кийиниш қоидаларига талаб анчадан бери амалда эканини, лекин аста-секин эътибордан четда қолаётганини таъкидлади.
«Кийим-бош ҳар доим театр этикасининг бир қисми бўлган. Театрга ташриф қоидаларига оид ёзув мана беш йилдан бери эшик олдига илиб қўйилган, сайт ва чипталарда ёзилган. Аммо вақт ўтиши билан одамлар кийим-кечак қоидаларига эътибор бермай қўйишди ва бунинг натижасида театрнинг обрўсига путур етказилмоқда. Энди қоидалар ижросини қаттиқ назорат қиламиз», — дейди директор.
У дресс-кодга итоат этиш театрда ўзгача муҳит яратиш учун зарурлигини тушунтирди.
«Одамлар чиройли кийиниб келишса, аудитория ўзгариб кетади ва ўша байрам туйғуси пайдо бўлади», — дейди Кабдурахмонов.
«Театрда очиқ қўл ва оёқларни кўрсатиш номақбулдир» деган эътирозга Катта театр матбуот котиби Юлия Зорина аниқлик киритади: бу ерда гап аёлларнинг очиқ-юпун кийиниши ҳақида эмас, балки эркаклар кийимига бўлган талаб ҳақида кетмоқда.
«Гап кечки дресс код ҳақида кетмоқда. Биз театрда футболка ва шортик кийиш мумкин эмаслиги ҳақида гапиряпмиз. Албатта, қўллари, ёки елкалари очиқ бўлган нафис кўйлакларни кийиш мумкин», — дейди матбуот котиби.
Театр раҳбарияти чипталар нархи ошишини ҳам маълум қилди. Кабдурахмоновнинг сўзларига кўра, «театр стандартига тўғри келмагани» учун минимал нарх – 44 минг сўм (3,50 доллар) қайта кўриб чиқилади. Шунингдек, пенсионерлар 50 фоизлик чегирмага эга бўладилар, Ўзбекистон давлат консерваторияси талабалари эса спектаклларни бепул томоша қилишлари мумкин бўлади.
Ўзгаришлар, шунингдек, театр залига кириш қоидаларига ҳам таъсир қилади. Учинчи қўнғироқдан сўнг зал эшиклари ёпилади ва томошабинларга фақат танаффус вақтида киришга рухсат берилади. Кабдурахмонов бу ўзгаришлар томошабинни тартибга чақириш, санъаткорларни ҳурмат қилиш учун зарурлигини таъкидлайди. Барча кечки спектакллар энди соат 19:00 да бошланади.
Театр, шунингдек, мобил телефонлардан фойдаланиш, фотосурат ва видеотасвирга олиш, томоша залига озиқ-овқат ва ичимликлар олиб кириш тақиқланишини эслатиб ўтади. Етти ёшгача бўлган болаларни катта томошабинларга мўлжалланган кечки спектаклларга олиб келиш чекланади.
«Биз жоҳиллик, саводсизлик ва маданиятсизликка қарши курашувчи элита куч бўлишимиз керак. Бунга эришиш учун театр алоҳида ҳурмат ва тартиб маскани бўлиб қолиши, одамлар бунга жиддий ёндашиши керак», — дейти театр директори.
ℹ️ 2021 йилдан буён театрга раҳбарлик қилиб келган Рамиз Усмонов ўрнига Алибек Кабдурахмонов шу йилнинг июль ойида Катта театрга раҳбар этиб тайинланди. Кабдурахмонов бунга қадар Ўзбекистон Миллий симфоник оркестри бош дирижёри лавозимида ишлаган. У 2024 йил август ойида Ўзбекистонда хизмат кўрсатган артист унвони билан тақдирланган.
