yuz.uz сайти фотосурати
Аргентина, Австралия ва Гондурас Ўзбекистон билан ўз бозорига кириш бўйича икки томонлама протоколларни имзолади ва шу орқали Марказий Осиё республикасининг Жаҳон савдо ташкилотига (ЖСТ) аъзолигини маъқуллади. Жараённи якунлаш учун яна уч давлат билан ана шундай келишувлар тузилиши керак, деб ёзади Ўзбекистон президентининг ЖСТ масалалари бўйича вакили Азизбек Ўрунов LinkedInда (РФ ҳудудида блокланган ижтимоий тармоқ).
Расмийга кўра, юқорида тилга олинган давлатлар билан музокаралар шу ҳафта Женевада бўлиб ўтган. Унда Президент Администрацияси раҳбари Саида Мирзиёева бошчилигидаги Ўзбекистон делегацияси иштирок этган.
Ўрунов имзоланган протоколлар республиканинг кўп томонлама савдо тизимига интеграциялашуви қўллаб-қувватланаётгани ва ҳамкорлик кучайиб бораётганидан яққол далолат эканини таъкидлайди. Унинг қўшимча қилишича, Ўзбекистоннинг ташкилотга аъзо бўлиши бўйича ЖСТнинг яна икки аъзоси билан принципиал келишувга эришилган, айнан кимлар билан эканига аниқлик киритмаган.
«Ҳар бир имзо Ўзбекистонни ЖСТга тўлақонли аъзоликка яқинлаштиради. Бу муҳим босқич иқтисодиётимиз, минтақамиз ва бутун дунё бўйлаб савдо ҳамкорларимиз учун янги имкониятлар очади. Битим имзолаган давлатлар сони ҳозирда 29 тага етди, яна иккита принципиал келишув бор. Икки томонлама музокараларни тўлиқ якунлаши керак бўлган атиги 3 та давлат қолди», — деб ёзади Ўрунов.
Президент вакили Ўзбекистоннинг ЖСТга аъзо бўлиши учун розилиги талаб қилинаётган савдо ташкилотининг қолган аъзолари номини айтмаган.
Бироқ, уларнинг орасида Россия ва Европа Иттифоқи бўлиши керак. Чунки жорий йил март ойида Москвада Ўзбекистоннинг Жаҳон савдо ташкилотига аъзо бўлиши доирасида бозорга чиқиш билан боғлиқ долзарб масалалар муҳокама қилингани ҳақида хабар берилганди. Ўзбекистон расмийлари ўшанда томонлар жараённи янада ривожлантиришдан манфаатдор эканини таъкидлашган. Бироқ тегишли ҳужжатларнинг имзоланиши ҳақида ҳеч қандай маълумот берилмаган.
Ўша ойда Европа Иттифоқи вакиллари билан маслаҳатлашувлар бўлиб ўтганди. Ўзбекистон делегацияси аъзоларининг сўзларига кўра, хизматлар бўйича келишувларга эришилган, бироқ товарлар бўйича ҳам шунга ўхшаш ишларни қилиш қолганди. «Яқин ойларда» Европа Иттифоқининг розилигини олиш режалаштирилган эди.
Май ойида Ўзбекистон Бош вазири ўринбосари Жамшид Хўжаев 2026 йилнинг март ойида Камерунда бўлиб ўтадиган 14-Вазирлар конференциясигача мамлакат ЖСТга аъзо бўлиш ниятида эканини маълум қилганди.
ℹ️ Ўзбекистон ЖСТга аъзо бўлиш учун 1994 йили ариза берган ва 2005 йил октябрь ойида Андижон воқеалари ортидан жараён тўхтатилгунга қадар ишчи гуруҳнинг учта йиғилиши ўтказилган. Мамлакат расмийлари ўз қонунчилигини ташкилот талабларига жавоб берадиган тарзда тузатишни давом эттирди ва 2017 йили аъзо бўлишга оид ишлар қайта бошланди.
ℹ️ ЖСТ — мамлакатлар ўртасидаги савдони тартибга солувчи глобал халқаро ташкилот. Битимлар асосини унинг аъзоларига маълум савдо ҳуқуқларини кафолатлайдиган шартномалар ташкил этади. Ташкилотга аъзо бўлиш учун хорижий ҳамкорларга савдо тўсиқларини камайтириш ва маҳаллий ишлаб чиқарувчилар учун протекционизмдан воз кечишни талаб қилади.
