AFP фотосурати
Давлатга тегишли «Туркмангаз» концерни Туркияга табиий газ етказиб беришни тўхтатди, деб хабар беради МК-Турция нашри.
«Туркманистон нефть ва гази – 2025» халқаро конференцияси якунлари бўйича ўтказилган матбуот анжуманида «Туркмангаз» раиси Максат Бабаев етказиб бериш вақтинча тўхтатилганини тасдиқлади. Унинг эслатишича, Туркманистон ва Туркия ўртасида имзоланган шартнома йилига 2 миллиард кубометр газ экспорт қилишни назарда тутади.
«Туркмангаз» раиси ўринбосари Мурат Арчаевнинг сўзларига кўра, келишув потенциал рисклар таҳлил қилинаётган синов лойиҳасидир. Техник жиҳатдан концерн шартнома бўйича ўз мажбуриятларини бажаришга тайёр, «ва мавжуд муаммолар ҳал қилингандан сўнг, имзоланган шартнома бўйича етказиб бериш қайта тикланади».
Бабаев Туркия билан шартнома қисқа муддатли эканлигини қўшимча қилди.
«Агар биз ҳажмлар ёки нархлар бўйича келиша олмасак, бизда бошқа харидорлар ҳам бор. Буни бозор, дейдилар», — дея Бабаев сўзларини келтиради Oilapital нашри Reutersга таянган ҳолда.
Худди шу халқаро конференцияда Туркиянинг давлатга қарашли ВОТАŞ газ компанияси бош директори Абдулваҳит Фидан Туркиянинг туркман газини узоқ муддатли, кенг кўламда етказиб беришга қизиқишини маълум қилди. Унинг таъкидлашича, Туркия ривожланган инфратузилмаси ва 34 мамлакат билан тижорат алоқалари туфайли минтақанинг газ таъминотида етакчи ўйинчига айланган. Тугалланган халқаро лойиҳалар орасида у Европага газ етказиб беришда муҳим рол ўйнайдиган Транс-Анадолу табиий газ қувурини (TANAP) алоҳида таъкидлади.
«Энди икки мамлакат янада улкан мақсадга — туркман газини узоқ муддатли, кенг кўламда етказиб беришга дуч келмоқда. Бу мақсадга эришиш бутун минтақа учун бурилиш нуқтаси бўлади», — дея Фидан сўзларини келтиради Report.az.
ℹ️ Март ойида Туркияга газ етказиб бериш бошланганлиги ҳақида хабар берар экан, туркман нашри Orient ВОТАŞ ва «Туркмангаз» ўртасидаги келишув томонларнинг 1990-йиллардаги музокаралардан сўнг қўлга киритилган тарихий муваффақияти эканини таъкидлаганди. Туркия Энергетика ва табиий ресурслар вазири Алпарслан Байрактар рақобатбардош нархда етказиб бериладиган туркман гази тахминан 1,5 миллион турк оиласининг йиллик эҳтиёжини қондиришини маълум қилганди.
Шартномага кўра, Анқара туркман газини Эрон орқали своп шартномаси орқали импорт қилади. 2025 йил охирига келиб етказиб бериш ҳажми 1,3 миллиард кубометрга етиши кутилмоқда. Май ойида Туркия президенти Ражаб Тоййиб Эрдоған ушбу етказиб беришни яна беш йилга узайтириш ниятида эканини эълон қилганди.
Октябрь ойи бошида Туркия Энергетика ва табиий ресурслар вазирлиги туркман гази импортини, жумладан, Каспий денгизи орқали кўпайтириш ниятида эканини эълон қилди. Туркия томони ушбу йўналиш Туркманистоннинг Европа Иттифоқини қўшган ҳолда учинчи давлат бозорларига киришини таъкидлади.
Туркманистон табиий газ захиралари бўйича дунёда Россия, Эрон ва Қатардан сўнг тўртинчи ўринда туради.
