Kloop.kg сайти фотосурати
Бишкекнинг Октябрь туман суди Temirov Live, Kloop.kg ва «Айт айт десе» нашрларини экстремистик деб тан олди. Бу ҳақда Kaktus.media Қирғизистон пойтахти шаҳар судига таяниб хабар берди.
Октябрь туман прокуратурасининг аризаси бўйича қарор 27 октябрь куни чиқарилди.
Нафақат юқорида тилга олинган нашрларнинг материаллари, балки уларнинг эгалари — Т.Б.М. (Болот Темиров, Temirov Live и «Айт Айт Десе») ва Т.Р.Р. (Ринат Тухватшин, Kloop.kg) нинг фаолияти ҳам экстремистик деб топилди.
Қирғизистоннинг «Экстремистик фаолиятга қарши кураш тўғрисида»ги қонунига кўра, экстремистик ташкилотлар материалларини тарқатиш тақиқланган ва бунинг учун жиноий жавобгарликка тортилиши мумкин.
ℹ️ Терговчи журналист Болот Темиров 2023 йил ноябрь ойида Қирғизистондан чиқариб юборилган ва унинг беш йилга мамлакатга кириши тақиқланган. Kloop.kg асосчиларидан бири Ринат Тухватшин ҳам чет элда яшайди.
2023 йил 30 декабрь куни Қирғизистон Ички ишлар вазирлиги интернетни мониторинг қилган пайтда «Айт Айт Десе» ва Temirov Live саҳифаларида оммавий тартибсизликларда иштирок этишга чақирувчи маълумотлар топилганини эълон қилган. Жиноий иш қўзғатилган ва 11 нафар журналист ҳибсга олинган. Улар норозилик намойишлари ва оммавий тартибсизликларга чақиришда айбланган. 2024 йил октябрь ойида Temirov Live ва «Айт Айт Десе» директори Махабат Тажибек қизи олти йилга озодликдан маҳрум қилинди, «Айт Айт Десе» оқини Азамат Ишенбеков беш йилга озодликдан маҳрум этилди ва икки журналист уч йиллик пробация муддатини олди. Иш бўйича қолган судланувчилар далиллар етарли эмаслиги сабабли оқланди.
Kloop.kg таҳририяти бир неча йиллардан бери расмийлар босими остида бўлган. 2023 йил кузида Kloop сайти блокланди ва 2024 йил февраль ойида суд лойиҳанинг юридик объекти — Kloop Media жамоат фондини тугатди. 2025 йил сентябрь ойида нашрнинг тўрт нафар собиқ ходими — иккита оператор ва иккита бухгалтер – «норозилик қўзғатиш ва оммавий тартибсизликларни уюштириш»да айбдор деб топилди.
