economist.kg сайти фотосурати
Қирғизистон президенти Садир Жапаров Энергетика вазирлигининг жамоатчиликни электр энергияси учун «чексиз тариф»га ўтишга ундаш ташаббусини танқид қилди. Давлат раҳбари бу опцияни дарҳол бекор қилишни талаб қилди, деб хабар беради Economist.kg.
Мамлакат раҳбарининг танқиди Энергетика вазири Таалайбек Ибраевга қаратилган бўлган. Жапаров ресурслар танқислиги шароитида «чексиз тариф»ни тақдим этиш амалиёти ноўрин экани ва бу ижтимоий кескинликка олиб келиши мумкинлигини таъкидлади.
Президент қишда электр энергиясига тенг киришни таъминлаш ва истеъмолчиларнинг айрим тоифаларига фойда келтирадиган қарорлардан қочиш учун амалдорлар масъул эканини таъкидлади.
Яқинда Қирғизистон Миллий электр тармоқлари вакиллари бутун мамлакат бўйлаб электр энергияси ишлаб чиқариш эрталаб ва кечқурун энг юқори соатларда вақтинча 5 киловаттдан 3 киловаттгача камайтирилишини эълон қилганди. Бу ҳаракатларнинг сабаби трансформатор подстанциялари куз ва қишда ортиқча юк остида ишлаши билан боғлиқ бўлган. Муаммолар, айниқса, янги бинолар ва аҳоли иситиш мавсумида кўплаб электр жиҳозларидан фойдаланадиган ҳудудларда кескин.
Расмийларнинг қўшимча қилишича, ресурсларни паст қувватда тақдим этиш 2026 йил март ойигача давом этади.
Шунинг учун истеъмолчиларга бир неча йил олдин жорий этилган «чексиз тариф»га ўтиш тавсия қилинган. Бу маълум бир туман ёки шаҳардаги электр тармоғи учун масъул ташкилот билан боғланиш ва электр энергияси таъминотини кўпайтиришни назарда тутувчи опцияга ёзилишни англатарди.
Турган гап, бунда истеъмолчилардан кўпроқ пул тўлаш талаб қилинади. Умумий қабул қилинган тарифларга кўра, ойига 700 кВт/соатгача бўлган электр энергияси истеъмоли киловатт-соат учун 1,37 сом (0,016 доллар), 700 кВт/соатдан ортиқ эса 2,6 сом (0,030 доллар) туради. Чексиз тариф билан бу нарх киловатт-соат учун 3,81 сом (0,044 доллар) гача кўтарилади.
Қирғизистон Энергетика вазирлигининг маълумотларига кўра, январдан октябргача мамлакатда 11,3 миллиард кВт/соат энергия ишлаб чиқарилган, истеъмол эса 13,8 миллиард кВт/соат бўлган. Натижада, тақчиллик 2,7 миллиард киловатт-соатни ташкил этган, бу импорт қилинган ресурслар ҳисобидан қопланади. Миллий электр тармоқлари компанияси шунингдек, ҳисобот даврида абонентлар сони 20 000 дан ортиққа ошганини таъкидлади.
