japan.kantei.go.jp сайти фотосурати
Ўзбекистон ва Япония икки томонлама муносабатлари кенгайтирилган стратегик шериклик даражасига чиқди. Бу омил Ўзбекистон президенти Шавкат Мирзиёев ва Япония Бош вазири Санае Такаичи ўртасидаги музокаралардан сўнг Токиода имзоланган қўшма баёнотда муҳрланди.
Музокаралар давомида барча муҳим соҳаларда Ўзбекистон-Япония ҳамкорлигини мустаҳкамлаш ва чуқурлаштириш батафсил муҳокама қилинди. Савдо айланмаси, инвестициялар ҳажми ва Япония капитали иштирокидаги қўшма корхоналар сонининг барқарор ўсиши қайд этилди. Ўзбекистонда муваффақиятли фаолият юритаётган компаниялар қаторида Sojitz, Toyota Tsusho, Sumitomo, Itochu, Kyoto Plaza, Balcom ва Shikoku Electric қайд этилди.
Япония халқаро ҳамкорлик агентлиги (Japan International Cooperation Agency, JICA) ва Япония халқаро ҳамкорлик банки (Japan Bank for International Cooperation, JBIC) билан қўшма лойиҳалар энергетика, нефть-кимё, транспорт, таълим ва қишлоқ хўжалигини қамраб олади. Саммитга тайёргарлик кўриш доирасида қиймати 12 миллиард доллардан ортиқ бўлган янги лойиҳалар портфели шакллантирилди. Уларни амалга ошириш учун қўшма инвестиция платформаси таклиф қилинди.
Томонлар «яшил» энергия, рақамли технологиялар, муҳим минералларни қазиб олиш, машинасозлик, соғлиқни сақлаш ва туризм инфратузилмасини модернизация қилиш соҳаларида ҳамкорлик истиқболларини муҳокама қилишди. Самарқанд вилоятида япон модели асосида махсус иқтисодий зона яратиш ва қўшма «Бир қишлоқ – битта маҳсулот» дастурини кенгайтириш таклифи қўллаб-қувватланди.
Музокараларда парламентлардаги «дўстлик гуруҳлари», иқтисодий ҳамкорлик қўмиталари, устувор йўналишлар бўйича тармоқ учрашувлари ва бошқа ҳамкорлик шаклларини фаоллаштириш муҳимлиги таъкидланди. Келгуси йили Самарқандда икки мамлакат ҳудудларининг биринчи форумини ўтказиш таклиф қилинди.
Гуманитар соҳасида таълим, фан ва маданият доирасида алмашинувларни фаоллаштиришга қарор қилинди. Ўзбекистонда Ўзбекистон – Япония Инсон ресурсларини ривожлантириш маркази маркази фаолият юритмоқда ва мамлакатдаги еттита университетда япон тили ўқитилади. Токио чет тиллар университетида мана 10 йилдирки, ўзбек тили ўрганилмоқда.
Мирзиёевнинг Японияга ташрифи давомида бир қатор ҳужжатлар, жумладан, олий таълим соҳасида ҳамкорлик тўғрисидаги ҳукуматлараро битим ва Цукуба университети билан биргаликда Тошкент шаҳрида биринчи Ўзбекистон – Япония университетини ташкил этиш тўғрисидаги меморандум имзоланди. Келишувда шунингдек, таълим ва фан бўйича қўшма комиссия, инновация консорциуми ташкил этилиши кўзда тутилган.
Бундан ташқари, соғлиқни сақлаш, экология, сув ресурслари, транспорт, шаҳарсозлик, туризм, қишлоқ хўжалиги ва табиий офатлар хавфини камайтириш соҳаларида келишувлар тўплами қабул қилинди. Ушбу келишувларни амалга ошириш бўйича «йўл харитаси» ишлаб чиқилади.
Ташриф давомида Ўзбекистон президенти шунингдек, Император Нарухито, парламент раҳбарияти, Дўстлик лигаси аъзолари, Япония ҳукумати вакиллари, Нара мэри ва етакчи университетлар ректорлари билан музокаралар ўтказди. Томонлар сиёсий, иқтисодий, инвестиция, маданий ва гуманитар соҳаларда ҳамкорликни кенгайтириш йўлларини муҳокама қилишди. Ташрифнинг ишбилармонлик дастури доирасида Япониянинг йирик компаниялари, молия институтлари раҳбарлари билан бизнес форум ва икки томонлама учрашувлар бўлиб ўтди.
Мирзиёев шунингдек, «Марказий Осиё + Япония» мулоқотининг биринчи саммитида иштирок этди ва у ерда ҳамкорликни ривожлантириш бўйича ташаббусларни тақдим этди; учрашув натижасида Токио декларацияси қабул қилинди.
Бундан ташқари, Токиода санъат усталарининг концерти, «Янги Ўзбекистон» фотокўргазмаси ва ҳунармандчилик буюмлари кўргазмасини ўз ичига олган Ўзбекистон маданияти кунлари бўлиб ўтди.
