tengizchevroil.com сайти фотосурати
Қозоғистоннинг энг йирик нефть кони Тенгиздаги нефть қазиб олиш 18 январь, якшанба куни тўхтатилганидан сўнг яқин 7-10 кун ичига қайта тикланиши эҳтимолдан йироқ. Бу Каспий қувурлари консорсиуми (КҚК) орқали хом нефть экспортининг камайишига олиб келади, деб хабар беради Reuters ушбу соҳадаги учта манбасига таяниб.
«Тенгизда хомашё қазиб олишнинг тўхтатилиши камида шу ҳафтанинг охиригача давом этиши мумкин, аммо пауза узоқроқ — февралгача давом этиши мумкин», — дейди манбалардан бири.
Хабарда айтилишича, кон оператори «Тенгизшевройл» компанияси КҚКнинг Қора денгиз терминалидан январь ва февраль ойларида жўнатилиши режалаштирилган жами тахминан 600 000-700 000 тонна бўлган CPC Blend хом нефтининг бешта экспорт партиясини бекор қилган.
Ҳозирча бу фактор Қозоғистондаги умумий хом нефть қазиб олишга таъсир кўрсатмаган, чунки бошқа нефть гигантлари — Қашаған ва Қорачиғаноқ қазиб олиш ҳажмларини фаол равишда оширишни бошлаганлар. Бироқ, манбанинг огоҳлантиришича, агар Тенгиздаги ишларнинг туриб қолиши давом этса, КҚК бир неча кундан сўнг нефть етказиб беришни камайтира бошлаши мумкин.
18 январь куни Тенгиздаги GTES-4 подстанциясидаги иккита трансформаторда бир вақтнинг ўзида ёнғин содир бўлди. Ёнғин ўчирилган ва ходимлар эвакуация қилинган. Ҳодиса сабаби ҳақида ҳозирча маълумот берилмаган. Эртаси куни «Тенгизшевройл» электр таъминотидаги муаммолар туфайли Тенгиз ва Қироллик конларида нефть қазиб олишни тўхтатилганини маълум қилди.
Тенгиз — Қозоғистоннинг энг йирик нефть ва газ кони бўлиб, Атирау вилоятида, Атирау шаҳридан 350 километр жануби-шарқда жойлашган. Қироллик кони Тенгиз билан туташган ҳолда, шимоли-шарқдан 20 километр узоқликда жойлашган. Иккала кон ҳам «Тенгизшевройл» томонидан бошқарилади. Бу компаниянинг 50% Chevron, 25% Exxon Mobil, 20% «КазМунайгаз» («Самрук-Казина» шўъба корхонаси) ва 5% Россиянинг «Лукойл»ига тегишли.
«Тенгизшевройл» ўзининг асосий маҳсулот ҳажмини Каспий қувурлари консорсиуми (КҚК) орқали экспорт қилади, аммо Южная Озереевкадаги (Новороссийск яқинидаги) денгиз терминали инфратузилмасига етказилган зарар туфайли хомашёнинг бир қисми энди Боку-Тбилиси-Жейҳан нефть қувурига ва «Дружба» нефть қувури орқали Германияга йўналтирилмоқда.
