t.me/aqorda_resmi сайти фотосурати
Қозоғистон Ғазо секторидаги Халқаро барқарорлаштириш кучларига (ISF) қўшин ва полиция тақдим этадиган мамлакатлар рўйхатига қўшилди. Бу ҳақда АҚШ президенти Дональд Трамп Фаластин анклавида келишувга эришиш учун АҚШ ташаббуси билан ташкил этилган Тинчлик кенгашининг биринчи йиғилишида маълум қилди, деб хабар беради ТАСС.
«Албания, Косово, Қозоғистон — уларнинг барчаси Ғазо секторида барқарорликни таъминлаш учун қўшин ва полиция ажратишга ваъда беришди. Миср ва Иордания ҳам катта ёрдам бериб, қўшин ажратиб, Фаластин полиция кучларини тайёрлашга кўмак бермоқда», — деди Трамп Вашингтондаги нутқида.
Олдинроқ, худди шу тадбир давомида у Қозоғистон президенти Қосим-Жомарт Тўқаевга очиқчасига миннатдорчилик билдирди ва Қозоғистонни «ажойиб ва бой мамлакат» деб атади.
Трамп шунингдек, Қозоғистонни Ғазога ёрдам сифатида маблағ ажратган мамлакатлар қаторидан ўрин олганини айтди. «Қозоғистон, Озарбайжон, БАА, Марокаш, Баҳрайн, Қатар, Саудия Арабистони, Ўзбекистон ва Қувайт биргаликда ёрдам дастурига 7 миллиард доллардан ортиқ маблағ ажратганини маълум қилишдан мамнунман. Бу ажойиб. Раҳмат, дўстлар», — дея ОАВ унинг сўзларини келтиради. Трампнинг сўзларига кўра, АҚШ «Тинчлик кенгаши»га 10 миллиард доллар маблағ ажратади.
Трамп 2026 йил 16 январда «Тинчлик кенгаши» ташкил этилганини эълон қилди. Ушбу ташкилотнинг ташкил этилиши АҚШ президентининг Ғазо учун тинчлик режасининг бир қисми бўлиб, унда Фаластин радикалларини қуролсизлантириш, Исроил қўшинларини анклавдан олиб чиқиш, у ерга халқаро барқарорлаштириш кучларини жойлаштириш ва секторни бошқариш тузилмалари устида ишларни бошлаш кўзда тутилган.
