Жумгалбек Шабданбеков. vb.kg сайти фотосурати
Қирғизистон Миллий хавфсизлик давлат қўмитаси (МХДҚ) коррупция ва уюшган жиноятчиликка қарши тизимли курашни давом эттиради, фақат қонуний йўллар билан. Жумладан, қўмита «ниқобли шоулар» амалиётидан воз кечади. Бу ҳақда махсус хизматнинг янги раҳбари Жумгалбек Шабданбеков «Вечерний Бишкек» газетасига берган интервьюсида таъкидлади.
Генерал МХДҚ ичидаги кадрлар «тозалаш»га урғу берди. Унинг сўзларига кўра, қонунбузарликларга йўл қўйганлар аллақачон лавозимларидан бўшатилган, уларнинг ҳаракатлари қонуний баҳоланади ва расмийлар бу ҳақда жамоатчиликни хабардор қилади.
«Бундан буён давлат идораларида дахлсизлар бўлмайди. Ноқонуний ҳаракатларда айбдор деб топилган ҳар бир киши жавобгарликка тортилади», — деди Шабданбеков.
У ислоҳотлар тизимли характерга эга бўлиб, ўзгарувчан халқаро вазиятни ҳисобга олган ҳолда хавфсизликни самарали таъминлаш ва республиканинг конституциявий тузумини ҳимоя қилишга қодир мослашувчан, профессионал ва шаффоф тузилмани яратишга қаратилганлигига аниқлик киритди. Махсус хизмат ислоҳотларида асосий эътибор оператив ва таҳлилий ишларнинг классик ва анъанавий усулларига қаратилади.
Офицер таъкидлашича, Миллий хавфсизлик қўмитаси партиялар, мафкуралар ёки бирон бир алоҳида манфаатлар таъсирига боғлиқ сиёсий восита бўлмаслиги керак.
«Миллий хавфсизлик давлат қўмитасини ислоҳ қилиш ташкилотни ҳуқуқий асосга ўтказилишини — эскирган, қаттиқ ҳарбий усуллардан ҳуқуқий, фуқаролик бошқарув усулларига ўтишини назарда тутади <…> Қўрқитиш мафкурасидан воз кечиш ва ҳозирги воқеликни акс эттирувчи замонавий миллий хизматни яратиш вақти келди», — деб хулоса қилди генерал.
Интервьюда шунингдек, 2024 йилда Қирғизистонда кириш чекланган TikTok ижтимоий тармоғини блоклашни қайта кўриб чиқиш масаласига ҳам эътибор қаратилди. Баъзи сиёсатчилар ва парламент аъзолари ушбу платформа Марказий Осиё республикасининг бизнес ва туризм салоҳиятини тарғиб қилиш учун платформага айланиши мумкин, деб ҳисоблашади.
МХДҚ раҳбари TikTok ижтимоий тармоғида қирғиз менталитетига мос келмайдиган маълумотлар тарқалаётгани ҳақидаги кўплаб фуқароларнинг шикоятларидан сўнг блокланганини эслатди. Шабданбеков бу ерда гиёҳванд моддалар, алкогол ва қимор ўйинлари очиқчасига реклама қилинаётгани, шафқатсизлик ва зўравонлик оқланаётгани, оилавий ва анъанавий қадриятлар рад этилаётганини қўшимча қилди, бу эса ўсмирларга айниқса салбий таъсир кўрсатади.
«Фарзандларимиз келажаги ҳар қандай ижтимоий тармоқлардан муҳимроқ. Ҳеч бир рақамли платформа ёш авлоднинг соғлиғи, таълими ва ахлоқий ривожланишидан муҳимроқ бўлиши мумкин эмас», — деди хавфсизлик хизмати раҳбари TikTokни блокдан чиқаришдан бош тортилаётганини тушунтирди.
У шунингдек, қўмита интернетни доимий равишда таҳлил қилиб, кузатиб боришини, бузғунчи ва ноқонуний контентлар тарқалишини олдини олишини тушунтирди.
