Imgirl.ru сайти фотосурати
Ўзбекистонда валюта курсининг, хусусан, АҚШ долларининг ўсиши тезлашди: 16 март куни Марказий банк уни дарҳол 180 сўмга оширди, ҳозир эса 11 330,38 сўмни ташкил этмоқда. Агар кўп йиллар давомида валюта курслари ҳафтада бир марта янгиланган бўлса, кейинги пайтда ҳар куни янгиланмоқда.
Spot.uz хабарига кўра, Ўзбекистон банкларининг аксарияти долларни 11 630 сўмдан сотмоқда, харид курси эса 11 515 сўмдан 11 570 сўмгача.
Марказий банк евро курсини 12 448,69 сўм даражасида белгилади, ўсиш 177,98 сўмни ташкил этган. Россия рублининг курси ҳам бироз ўсди – 105,15 сўмгача.
Украинада 24 февралда бошланган ҳарбий амалиёт туфайли Ғарб томонидан Россия Федерациясига нисбатан жорий этилган иқтисодий санкциялар фонида Россия валютаси кескин заифлашди. 1 январдан 1 мартгача рублнинг сўмга нисбатан қадрсизланиши 26,1 фоизни ташкил этди.
3 мартдан Ўзбекистон банкларида жойлашган, авваллари фақат АҚШ доллари ва евро билан операциялар билан шуғулланган валюта айирбошлаш шохобчалари Россия рублини сотиш ва сотиб олишни бошлади. Бир кун ичида республика аҳолиси 60 миллиондан ортиқ рублни сотиб олди, 5,48 миллион сотди.
