Тожикистон ва АҚШ икки давлат ўртасида тўғридан-тўғри йўловчи рейсларини йўлга қўйиш имкониятини кўриб чиқмоқда. Парвозларни Тожикистоннинг Somon Air ҳамда АҚШнинг United Airlines авиакомпаниялари амалга ошириши кутилмоқда. Ҳаво қатнови тўғрисидаги ҳукуматлараро битим лойиҳаси аллақачон тайёрланган, деб хабар беради «Авеста» Марказий Осиё республикаси Фуқаро авиацияси агентлигига таянган ҳолда.
Мазкур масала Душанбеда Фуқаро авиацияси агентлиги директори Ҳабибулло Назарзоданинг АҚШ элчихонасининг муваққат ишлар вакили Карсон Релиц Рокер бошчилигидаги дипломатик миссия вакиллари билан учрашувида муҳокама қилинди. Томонлар авиаташувларни ташкил этиш истиқболларини ва фуқаро авиацияси соҳасидаги келгуси ҳамкорликни кўриб чиқдилар.
Тожикистон идораси маълумотларига кўра, икки мамлакат ҳукуматлари ўртасида «Ҳаво қатнови тўғрисида»ги битим лойиҳаси республиканинг соҳавий вазирлик ва идоралари кўриб чиқишида турибди. Ҳужжат келишилгандан сўнг томонлар тўғридан-тўғри рейсларни йўлга қўйишга киришишлари мумкин бўлади.
Парвозлар бошланишининг аниқ муддатлари ҳозирча эълон қилинмаган. Шунингдек, қайси Америка шаҳарлари йўналишлар тармоғига киритилиши ва рейслар қандай мунтазамликда амалга оширилиши ҳам номаълум.
Тўғридан-тўғри рейсларни очиш истиқболи АҚШда виза сиёсатининг кучайтирилиши фонида муҳокама қилинмоқда. 2026 йил 21 январдан бошлаб Тожикистон фуқаролари учун B-1/B-2 тоифасидаги АҚШ сайёҳлик ва ишбилармонлик визаларини расмийлаштиришда мажбурий пул гарови талаби амал қилмоқда.
АҚШ Давлат департаменти маълумотларига кўра, гаров миқдори $10 минг, $15 минг ёки $20 мингни ташкил этади. Аниқ суммани суҳбат чоғида консуллик ходими белгилайди. Ушбу талаб виза олишнинг қолган шартларига жавоб берадиган аризачиларга тааллуқлидир. Пул маблағлари белгиланган қоидаларга риоя қилинганда, хусусан, Қўшма Штатлардан ўз вақтида чиқиб кетилганидан сўнг қайтарилади. Шу билан бирга, гаров пулини тўлашнинг ўзи виза берилишини кафолатламайди.
Тўғридан-тўғри авиақатновни йўлга қўйиш бўйича музокаралар бир неча йилдан буён давом этмоқда. 2024 йил апрелида Somon Air 2025 йилда Душанбе — Нью-Йорк — Душанбе йўналишини очиш нияти ҳақида маълум қилган эди, бироқ бу режалар амалга ошмади. 2025 йил ноябрида Тожикистон ва АҚШ авиация идоралари вакиллари Вашингтондаги музокараларда тўғридан-тўғри рейсларни очиш имкониятини яна муҳокама қилишган эди.
Ўша ойда, «Марказий Осиё — АҚШ» саммити давомида Somon Air авиакомпанияси ва АҚШнинг Boeing корпорацияси 14 тагача самолёт харид қилишни кўзда тутувчи келишув ҳақида эълон қилишди. Гап тўртта узоқ масофага учувчи Boeing 787-9 Dreamliner ҳамда ўнта Boeing 737-8 MAX ҳақида кетмоқда.
Тожикистон ташувчиси учун бу узоқ қитъалараро парвозларга мўлжалланган кенг фюзеляжли самолётларни сотиб олиш бўйича илк лойиҳадир. Somon Air янги ҳаво кемалари Душанбедан мавжуд Европа, Осиё ва Яқин Шарқ бўйлаб парвозлар тармоғидан ташқарига чиқувчи йўналишларни очиш имконини беришини билдирган эди.
