akchabar.kg сайти фотосурати
Европа тикланиш ва тараққиёт банки Марказий Осиёдаги ёш тадбиркорларни қўллаб-қувватлаш мақсадида «Бизнесдаги ёшлар» (YiB CA) дастурини ишга туширмоқда. ЕТТБ уни амалга ошириш учун 200 миллион евро ажратади, деб хабар беради EuropaWire.
Дастур етти йил давом этади. У 35 ёшгача бўлган шахслар томонидан бошқариладиган ёки эгалик қиладиган микро, кичик ва ўрта корхоналарга (МКЎК) қаратилган.
Мурожаатда таъкидланганидек, лойиҳани амалга оширишда Марказий Осиё ва Мўғулистондаги 20 тагача ҳамкор молия институтлари иштирок этади ва кейинчалик кредитлаш учун молиялаштирилади.
ЕТТБ сармояси инклюзив кредитлаш ва ёшлар тадбиркорлигини рағбатлантириш учун 30 миллион еврогача бўлган грантлар ва имтиёзли қўшма молиялаштириш пакети билан тўлдирилади.
ЕТТБ тадқиқоти шуни кўрсатадики, кичик ва ўрта бизнеснинг қарийб 47 фоизи 35 ёшгача бўлган ёшлардир. Бироқ, уларнинг атиги 10 фоизи зарур тайёргарлик ва касбий тажрибага эга.
ℹ️ ЕТТБ Марказий Осиёдаги етакчи институционал инвестор ҳисобланади. Бугунги кунга қадар у 1000 дан ортиқ лойиҳалар орқали тахминан 19 миллиард евро ажратган.
Жорий йилнинг май ойида ЕТТБ Марказий Осиёдаги постсовет республикалари (фақат Туркманистон бўйича маълумотлар йўқ) иқтисодиётининг яқин келажакдаги ўсиши бўйича прогнозини эълон қилди:
📈 Қозоғистон: 2023 йили 3,9%, 2024 йили 4,2%;
📈 Қирғизистон: 2023 йили 7,0%, 2024 йили 7,2%;
📈 Тожикистон: 2023 йили 7,5%, 2024 йили 7,5%;
📈 Ўзбекистон: 2023 йили 6,5%, 2024 йили 6,5%.
