Ўзбекистон Президенти Шавкат Мирзиёев 2 май куни III Тошкент халқаро инвестиция форумида сўзлаган нутқида хорижий инвесторларни қўллаб-қувватлаш бўйича янги чора-тадбирлар борасида сўз юритди.
Ҳукумат, жумладан қуйидагиларни режалаштирган:
👉 хорижий инвесторларни уч йил муддатга акциялардан олинган дивидендлар бўйича солиқлардан озод қилиш;
👉 хорижий инвесторларга ер участкаларини ижарага бериш муддатини 25 йилдан 49 йилгача узайтириш;
👉 қонун ҳужжатларида кафолатланган мавжуд имтиёз ва преференцияларни сақлаб қолган ҳолда, махсус иқтисодий зоналар (МИЗ) фаолияти муддатларига қўйилган чекловни бекор қилиш;
👉 Жаҳон савдо ташкилоти (ЖСТ) тартиб ва стандартларига мувофиқ инвестиция қонунининг янги таҳририни қабул қилиш;
👉 юқори рейтингга эга тадбиркорлик субъектларини солиқ текширувларидан озод қилиш;
👉 Халқаро рақамли технологиялар марказида Халқаро тижорат суди ишини бошлаш (уни 2023 йил охиригача очиш режалаштирилган эди).
Президент Ўзбекистонда «низоларни адолатли ҳал этиш мақсадида Тошкент халқаро арбитраж маркази муваффақиятли фаолият юритаётганини» эслатиб ўтди. У АҚШ, Буюк Британия, Италия, Швеция, Хитой ва БАА каби мамлакатлардан 90 дан ортиқ нуфузли ҳакамлардан иборат.
«Бизнинг асосий мақсадимиз – Ўзбекистонни хорижий инвесторлар учун ишончли ва узоқ муддатли ҳамкорга айлантиришдир. Давлатимиз бозор муносабатларини ривожлантиришни, инвесторлар ҳуқуқлари ишончли ҳимоя қилинишини, қулай инвестиция ва ишбилармонлик муҳитини янада такомиллаштиришни, ҳалол рақобат учун янада кенг шарт-шароитлар яратишни, хусусий мулк дахлсизлиги ва суд тизимининг мустақиллиги таъминланишини ўз зиммасига олмоқда», — деди Шавкат Мирзиёев.
Унинг сўзларига кўра, сўнгги етти йил ичида (яъни Мирзиёев ҳокимиятга келганидан бери) Ўзбекистон 60 миллиард доллардан ортиқ хорижий сармояни ўзлаштирган. Ижтимоий соҳа ва инфратузилмани ривожлантиришга халқаро молия институтларининг 14 миллиард доллардан ортиқ маблағлари жалб этилган. Биргина ўтган йилнинг ўзида хорижий инвестициялар қарийб икки баробарга ошган.
Ўзбекистон иқтисодиёти қарийб икки баробарга ошган. Ўтган йил охирида ўсиш 6 фоизни ташкил этган, инфляция даражаси 9 фоизга тушган. Савдо айланмаси кўрсаткичлари ошиб бормоқда, валюта бозори ва олтин-валюта захиралари барқарорлиги сақланиб қолмоқда. Олий таълим қамрови 9 фоиздан 42 фоизга кўтарилган, олий ўқув юртлари сони 200 тадан ошган. 90 дан ортиқ давлат фуқаролари Ўзбекистонга визасиз ташриф буюриш имкониятига эга бўлди, деди Мирзиёев.
Президент хорижий инвесторлар билан ўзаро манфаатли ҳамкорликни кенгайтиришнинг устувор йўналишларини белгилаб берди:
✅ «яшил» энергия;
✅ банк-молия сектори;
✅ минераллар;
✅ мамлакатнинг рақамли трансформацияси;
✅ транспорт инфратузилмасини ривожлантириш.
Мирзиёев III Тошкент халқаро инвестиция форуми иштирокчиларини барча устувор йўналишлар бўйича йирик лойиҳаларда иштирок этишга таклиф қилди.
«Ҳар бир ташаббус, ҳар бир лойиҳангиз бўйича давлатимиз, ҳукуматимиз аъзолари сизларга елкадош бўлиб, ёнингизда туриб, уларни тўлиқ амалга оширишда яқиндан ёрдам беради. Шундай қилсак, сизларга маъқул бўлади, деб ўйлайман», — деди Ўзбекистон президенти.
«Инвестициялар – бу мамлакатимиз трансформациясининг локомотиви ва иқтисодий тараққиётимизнинг мустаҳкам драйверидир», — деди Мирзиёев.
