Жиззахдан ЖАР орқали АҚШга олиб борадиган тахминий йўл. «Фарғона» фотосурати
Жиззах вилоятида яшовчи A.Я. ҳамюрти ўғлини АҚШга жўнатишни ваъда қилиб, аслида Жанубий Африка Республикасига (ЖАР) жўнатиб юборган. Бу ҳақда вилоят ИИБ матбуот хизмати хабар беради.
А.Я ўз хизмати учун 14,3 минг доллар олган. Йигит Африкага келганида, A.Я. отасидан ўғлининг АҚШга етиб олишига ёрдам бериш учун яна 6,7 минг доллар сўраган. Йигитнинг отаси ҳуқуқ-тартибот органига мурожаат қилган ва A.Я. сўралган суммани олаётган пайтда ушланган. Мазкур ҳолат юзасидан жиноий иш қўзғатилиб, тергов ҳаракатлари олиб борилмоқда.
ℹ️ Сўнгги пайтларда Ўзбекистон оммавий ахборот воситаларида Ўзбекистон фуқароларига Мексика орқали АҚШга ноқонуний киришда ёрдам беришни ваъда қилаётган фуқаролар қўлга олинаётгани ҳақида хабарлар кўпаймоқда. Ўз хизматлари учун улар $15 минг ва ундан юқори миқдорда пул сўрашади.
2022 молия йилида АҚШ божхона ва чегара хизмати АҚШ-Мексика чегарасида тахминан 3200 нафар Ўзбекистон фуқаросини аниқлаган, бу 2021 йилга нисбатан 4,5 баравар кўп (700 кишидан кам). 2021 йил октабридан 2023 йил октабригача бўлган даврда АҚШга чегарани ноқонуний кесиб ўтишга уринган 13624 нафар Ўзбекистон фуқароси қўлга олинган ва бу энг кўп ноқонуний муҳожирлар келган давлатлар шартли рейтингидаги учинчи ўриндир.
2023 йил ноябрь ойида АҚШ ҳукумати Мексикадан мамлакатга ноқонуний кирган Ўзбекистон фуқароларини мамлакатга киритмасликка қарор қилган эди. Жорий йилнинг июнь ойи бошида Калифорния чегарачилари Ўзбекистон, Қозоғистон, Қирғизистон, Россия, Молдова ва Грузия фуқаролигига эга бўлган ноқонуний мигрантларни зудлик билан депортация қилишга доир буйруқ олган.
