Виктор Майко. turkmenistan.mfa.gov.ua сайти фотосурати
Украина президенти Владимир Зеленский Виктор Майкони Қозоғистонга янги элчи этиб тайинлаш ҳақидаги фармонни имзолади. Ҳужжат давлат раҳбари сайтида эълон қилинди.
Майко аввалроқ Украинанинг Туркманистондаги элчихонасини бошқарган. Бунгача у Украина Ташқи ишлар вазирлиги раҳбари ўринбосари, 2014-2020 йиллари эса ташқи ишлар маҳкамасига раҳбарлик қилган.
Украинанинг Қозоғистондаги элчиси лавозими дипломатик жанжал марказида қолган Пётр Врублевский*нинг истеъфога чиқиши ортидан – 2022 йил кузидан бери бўш қолганди.
2022 йил август ойида қозоғистонлик блогер Диас Кузаировга берган интервьюсида Врублевский Россия махсус операциясини шарҳлар экан: «Биз ҳозир русларни қанча кўп ўлдирсак, болаларимизга шунчалик кам иш қолади» деган. Бу баёнот кенг резонансга, шунингдек Қозоғистон Ташқи ишлар вазирлигининг норозилигига сабаб бўлганди. Вазирлик расмий вакили Айбек Смадияровнинг айтишича, Врублевский ўз сўзлари учун узр сўраган.
Кейинроқ Россия ОАВлари Пётр Врублевский расмийлар илтимосига кўра Қозоғистонни тарк этгани ҳақида хабар берган. Бироқ, Қозоғистон Республикаси Ташқи ишлар вазирлиги ҳукумат дипломатни чиқариб юбориш бўйича талаблар қўймагани ва у таътилга чиққанини маълум қилган. 2022 йил октябрь ойида Врублевский ўз лавозимидан четлатилган. Кейинчалик Россияда у сиртдан олти йиллик қамоқ жазосига ҳукм қилинган.
2023 йил март ойида журналистлар Қозоғистон Республикаси Ташқи ишлар вазирлигининг расмий вакили Айбек Смадияровдан нима учун Украинанинг республикадаги янги элчиси ҳалигача тайинланмагани ҳақида сўрашган. Бунга жавобан Смадияров бу «оддий ҳодиса» экани ва бу лавозим қанча вақт бўш қолиши мумкинлигини жўнатувчи томон ўзи ҳал қилишини таъкидлаганди.
* Экстремистлар ва террорчилар рўйхатига киритилган.
