Қаҳрамон Олимов. gazeta.uz сайти фотосурати
Францияда Anorbank акциялари назорат пакетининг эгаси, 1 миллиард доллардан ортиқ активларни бошқарадиган 48 ёшли Қаҳрамон Олимов ўғирлаб кетилган. Бу ҳақда Le Monde газетасига таяниб, Repost хабар берди.
Нашрнинг ёзишича, Олимов француз ҳамкорлари билан музокаралар олиб бориш ва кўчмас мулк сотиб олиш бўйича битимни расмийлаштириш учун 22 июнь куни Парижга келган. Ўша куни у ўзини Туркиядаги гўзаллик салонининг ходимиман деб таништирган Анастасия исмли қиз билан танишиб, унга телефон рақамини қолдирган.
Эртаси куни, мунтазам хабарлардан сўнг, Олимов «Анастасия» билан меҳмонхона ёнида учрашишга рози бўлади. Шу пайт унга уч киши ҳужум қилади: бири қўлларини қайиради, иккинчиси томоғидан бўғади, учинчиси эса оёқларидан ушлаб олади. Олимовни Mercedes фургонига тиқишади, аёл эса полицияга қўнғироқ қилиш илтимосига жавоб бермайди.
Банкирни баланд панжарали хусусий уйга олиб боришади, у ерда банкир ўғрилар орасидан Туркияга кўчиб кетган собиқ бизнес шеригини таниб қолади. У банкирни банк улушини тортиб олишда айблайди ва 10 миллион доллар тўлашни талаб қилади. Жабрланувчини калтаклашган, юзига уришган ва дорга осиб қўйишни саҳналаштиришган. Кейинроқ уни Ниццага олиб кетишган, у ерда сарой ертўласида ушлаб туришган ва ўлим билан таҳдид қилишган.
Банкир сўралган сумма қисман тўлаганидан кейингина қўйиб юборилган. Озодликка чиққач, Олимов Ниццадаги вокзалга етиб олган, поездда Парижга жўнаб кетган ва у ерда полицияга мурожаат қилган. Шифокорлар бир нечта кўкаришлар, калтакланиш белгилари ва травмадан кейинги стресс белгиларини қайд этганлар.
1 июль куни Франция полицияси ўғирликда гумон қилинаётганлардан бири -Туркия фуқаросини қўлга олган. Қаҳрамон Олимовнинг ўзи Тошкентга қайтиб келган ва вакилига кўра, шахсий хавфсизлигини кучайтирган.
