gov.kz сайти фотосурати
Хитой Қозоғистонда иккинчиси каби учинчи атом электр станциясини ҳам қуради. Бу ҳақда ҳукумат брифингида Бош вазирнинг биринчи ўринбосари Роман Скляр маълум қилди, деб ёзади Kursiv.kz.
«Атом энергияси агентлиги ва «Электр атом станциялари» масъулияти чекланган жамиятидаги ҳамкасбларимиз ҳозирда дислокация устида ишламоқда. Станция яқинида доимий сув таъминоти манбаи бўлиши керак», — деди мулозим.
Эслатиб ўтамиз, Росатом республикадаги биринчи станцияни Олмаота вилоятининг Жамбил туманидаги Улкен қишлоғида қуришни режалаштирмоқда. Жорий йили масъул давлат идоралари навбатдаги иккита АЭС қаерда жойлашишини эълон қилади.
Иккинчи атом электр станциясини қуриш бўйича консорциум етакчиси катта эҳтимол билан Хитойнинг China National Nuclear Corporationси бўлади. Мутахассислар қурилиш учун эҳтимолий жой сифатида Шарқий Қозоғистон вилоятининг Курчатов шаҳрини номлашмоқда.
Президент Қосим-Жомарт Тўқаев ўтган йил баҳорида Бурабайдаги қурултойда Қозоғистонда учта атом электр станцияси қуриш зарурлигини маълум қилганди. Унинг таъкидлашича, республика учун янги энергетика тармоғини яратиш стратегик аҳамиятга эга бўлиб, уни келгуси ўнлаб йиллар давомида ривожлантириш учун замин яратади. Бунинг учун иккита станция етарли бўлмайди, якунда тўлақонли ядро кластерини шакллантириш учун учинчисини қуриш керак, деганди Тўқаев.
