akorda.kz сайти фотосурати
Қозоғистон президенти Қосим-Жомарт Тўқаев сунъий интеллект (СИ) тизимлари учун «ўзига хос фатволар»ни ишлаб чиқарувчи динлараро комиссия тузишни таклиф қилди. Бу ҳақда у Остонада бўлиб ўтган Дунёвий ва анъанавий динларнинг VIII қурултойида маълум қилди, деб хабар беради Оқўрда.
«Ишончим комилки, диний етакчилар ахлоқий қадриятлар посбони сифатида инсониятнинг рақамли келажаги муҳокамасида иштирок этиши керак», — дея Токаевнинг сўзларини келтиради унинг матбуот хизмати. — Мен сунъий интеллектни ривожлантириш этикаси бўйича динлараро комиссия тузишни таклиф қиламан, у нейрон тармоқлар ва бошқа илғор технологиялардан масъулиятли фойдаланиш учун универсал тамойиллар тўпламини ишлаб чиқади».
«Гап инсон қадр-қимматини ҳурмат қилиш, камситишларга йўл қўймаслик ва инсон тақдирига таъсир қилувчи характерга эга қарорлар устидан назоратни назарда тутувчи ноёб «алгоритмлар учун фатволар» ҳақида кетмоқда», — дея аниқлик киритди у.
17 сентябрь куни Қозоғистон пойтахтида Дунёвий ва анъанавий динлар етакчиларининг VIII қурултойи очилди, унда 60 га яқин давлатдан 100 дан ортиқ делегация иштирок этмоқда. Тадбирда рус православ черкови номидан Москва ва Бутун Рус Патриархи Кирилл иштирок этмоқда.
Сўнгги ойларда Тўқаев мунтазам сунъий интеллектни ривожлантириш ҳақида гапириб келади. Унинг 8 сентябрь куни эълон қилинган Мурожаатномасининг салмоқли қисми унга бағишлан эди. Президентнинг сўзларига кўра, сунъий интеллект Қозоғистон ҳаёти ва иқтисодиётининг барча соҳаларига жорий этилиши керак, бу эса республикани тараққий этишига имкон беради. Биринчи қадам сифатида Рақамли кодексни қабул қилиш ва ихтисослаштирилган қўмита негизида Сунъий интеллект вазирлигини ташкил этиш режалаштирилган.
