gov.kz сайти фотосурати
Қозоғистоннинг икки вилояти — Туркистон ва Олмаота аҳолиси автогаз тақчиллиги ҳақида хабар беришди. Ҳайдовчиларнинг ёқилғи қуйиш шохобчалари ёпиқ ва ёқилғи тугаб қолганини даъво қилаётган видеолари ижтимоий тармоқларда пайдо бўла бошлади, деб хабар берди Tengrinews нашри.
Туркистон вилояти аҳолиси томонидан суратга олинган видеолардан бири «Президентга хатлар» Телеграм каналида эълон қилинди. Автогаз тақчиллиги ҳақидаги шикоятлардан ташқари, баъзи автогаз қуйиш шохобчалари нархни белгиланган лимитдан сезиларли даражада оширгани ҳам хабар қилинган.
Энергетика вазирлиги ушбу видеоларга изоҳ бериб, мамлакатда автогаз тақчиллиги йўқлигига ва баъзи ёқилғи қуйиш шохобчаларидаги вақтинчалик узилишлар «ой охирида октябрь ойидаги ёқилғи таъминотининг тугаши билан боғлиқ» эканига ишонтирди.
Бу Атирау нефтни қайта ишлаш заводида режалаштирилган техник хизмат кўрсатиш туфайли мамлакатда ишлаб чиқаришнинг вақтинчалик камайиши билан боғлиқ бўлган. Ноябрь ойи учун Туркистон вилоятига 11 774 тонна газ ажратилган, шундан 1594 тоннаси аллақачон транзитда.
Ноябрь ойида Олмаота вилоятига 6728 тонна газ ажратилган. Вазирлик маълумотларига кўра, вилоятнинг ёқилғи захираси 1214 тоннани ташкил этади, бу эса кунлик 270 тонна талабни қондириш учун етарли.
Вазирлик шунингдек, автогазни ёқилғи қуйиш шохобчалари ўртасида тақсимлаш учун акимат ишчи гуруҳи масъул эканлигини таъкидлади. Нархларнинг асоссиз ошиши ҳолатлари ҳақида 8 701 855 02 48 ва 8 (7172) 57 44 81 ишонч телефонларига қўнғироқ қилиш орқали хабар бериш мумкин.
Октябрь ойининг бошида Ғарбий Қозоғистонда суюлтирилган табиий газ танқислиги кузатилган. Манғистов вилоятида ёқилғи қуйиш шохобчаларида навбатлар пайдо бўлди ва ҳайдовчилар таъминотдаги узилишлардан шикоят қилишди. Ой охирида Шимолий Қозоғистон вилоятидаги ҳайдовчилар ҳам суюлтирилган газнинг жиддий танқислигига дуч келишган. Кўпгина ёқилғи қуйиш шохобчалари ёқилғини фақат купонлар билан тарқатишган.
