Исломободдаги теракт асоратлари. Waseem Khan/Reuters фотосурати
Покистоннинг Исломобод шаҳридаги Олий суд яқинида содир бўлган портлашда камида 12 киши ҳалок бўлди ва 20 дан ортиқ киши жароҳат олди. Расмийлар бу воқеани худкушлик ҳужуми сифатида кўриб чиқмоқда, деб хабар беради TRT Покистон Ички ишлар вазирлигига таяниб.
Ички ишлар вазири Моҳсин Нақвининг сўзларига кўра, бу сўнгги йилларда шаҳарда содир бўлган энг ҳалокатли террорчилик ҳужумидир. Ҳужум ҳукумат идоралари жойлашган ҳудудда содир бўлган ва жамоатчилик орасида ваҳима қўзғатган.
Вазир худкуш террорчи полиция машинаси ёнида мосламани портлатганини аниқлади. Хавфсизлик кучлари ҳозирда ҳужум тафсилотларини, жумладан, жиноятчининг шахсини ва унинг Исломободга қаердан келганини аниқлашга ҳаракат қилишмоқда.
Нашр воқеа пайтида суд биноси ташқарисида бўлган гувоҳлар – адвокатлар сўзларини келтиради. Улар кучли портлаш ҳақида хабар беришган, шундан сўнг одамлар ваҳима ичида тарқалиб кетишган, асосан маъмурий мажмуа ичида бошпана излашган. Улар қочиб кетаётганда, адвокатлар ёнаётган машиналар ва асосий дарвоза ёнида ётган бир нечта жасадларни кўришган.
Ҳозирча ҳеч ким ҳужум учун жавобгарликни ўз зиммасига олмади. Бироқ, Покистон расмийларининг ўз назариялари бор. Бош вазир Шеҳбаз Шариф портлашни мамлакатнинг узоқ вақтдан бери душмани бўлган Ҳиндистон томонидан қўллаб-қувватланган террорчилар амалга оширган бўлиши мумкинлигини айтди. Бироқ, ҳукумат раҳбари бу гипотезани қўллаб-қувватловчи ҳеч қандай далил келтирмаган.
Шу билан бирга, у фожиага Покистон толибонлари* ёки Балужистон вилоятидан бўлган сепаратистлар* алоқадор бўлиши мумкинлигини таъкидлаган.
Покистон Мудофаа вазири Хаважа Асиф, ўз навбатида, ҳужум изини «Толибон»* томонидан назорат қилинадиган қўшни Афғонистондан излаш кераклигини айтади. Унинг таъкидлашича, мамлакатлар ўртасидаги тўқнашувлар тез-тез содир бўлмоқда, жумладан, октябрь ойида сўнгги йиллардаги энг йирик можаролардан бири юз берди.
Вазирлик раҳбарининг сўзларига кўра, Исломободга қилинган ҳужум Кобулдан йўлланган «салом»дир, аммо Покистон бу саломга «алик» бериш учун барча имкониятларга эга.
*Кўпгина мамлакатларда террорчи сифатида тан олинган ва тақиқланган ташкилот.
