Абдураҳмон Абдураҳмонзода. asiaplustj.info сайти фотосурати
Тожикистон президенти Эмомали Раҳмон Абдураҳмон Абдураҳмонзодани Иқтисодий ривожланиш ва савдо вазири этиб тайинлади. Тегишли фармон 14 ноябрь куни давлат раҳбарининг расмий сайтида эълон қилинди.
Ушбу лавозимни эгаллаган Завқи Завқизода Тожикистоннинг АҚШдаги Фавқулодда ва Мухтор элчиси этиб тайинланди. Шу куни республиканинг Франция, Италия ва Австриядаги янги элчилари тайинланди.
Президент розилиги билан Россиянинг бир нечта вилояти ва шаҳарларида Тожикистоннинг бош консуллари тайинланди. «Азия-плюс» нашрининг таъкидлашича, тожик дипломатияси тарихида илк бор аёл киши бундай лавозимни эгаллаган: Зарина Исмоилзода Новосибирскдаги Тожикистон консуллиги раҳбари этиб тайинланди. Ушбу тайинловдан олдин у Ташқи ишлар вазирлигининг Ахборот ва матбуот департаменти бошлиғи ўринбосари лавозимида ишлаган.
ℹ️ Иқтисодий ривожланиш ва савдо вазирлигининг янги раҳбари Абдураҳмон Абдураҳмонзода 1988 йил 11 ноябрда туғилган. У Нью-Йорк институтини (АҚШ, 2010) ва Тожикистон миллий университетини (2012) тамомлаган ва у ерда глобал иқтисодиёт бўйича магистрлик даражасини олган. Ҳозирда у «Тожикистон Республикасининг интеграция жараёнларини халқаро савдо тизимига институционализация қилиш» мавзусида докторлик диссертацияси устида ишламоқда.
Абдураҳмонзода фаолияти Жаҳон савдо ташкилоти (ЖСТ) билан ҳамкорлик, савдо сиёсати ва истеъмол бозорларини назорат қилувчи бўлимлар билан боғлиқ бўлган. У 2020 йилдан 2023 йилгача Иқтисодий ривожланиш ва савдо вазирининг ўринбосари лавозимида ишлаган, шундан сўнг Душанбе шаҳар ҳокими ўринбосари этиб тайинланган.
